חסידי וויזניץ איבער די גארער וועלט נעמען אויף מיט גרויס דערלייכטערונג איבער א שטארקע שינוי לטובה אין די מצב הבריאות ביי כ"ק אדמו"ר מוויזניץ שליט"א פון לאנדאן, ווען אין די יעצטיגע טעג איז געמאלדן געווארן איבער אפיציעלע זמני קבלת קהל ביים רבי'ן, נאך לאנגע חדשים וואס עס איז נישט געווען קיין עפנטליכע זמני קבלת קהל פארן ציבור אריינצוגיין אל הקודש פנימה מיט קוויטלעך.
ווי באקאנט איז דער וויזניצער רבי פון לאנדאן ארויסגעקומען קיין אמעריקע מיט נאנט צו דריי חדשים צוריק, נאך א לענגערע שוואכקייט וואס האט געפלאגט דעם רבי'ן אין געזונט, דא אין אמעריקע איז דער רבי אריבער פארשידענע אונטערזוכונגען ביי הויכראנגיגע פראפעסארן מיטן האפענונג צו דערגיין דעם אורזאך פון די שוואכקייט, און מיט איבער א וואך צוריק איז דער רבי אריבער אן אפעראציע אין שפיטאל וואו מען האט דורכגעפירט פארשידענע באהאנדלונגען וואס זאל ארויסהעלפן דעם רבינ'ס געזונט אויף א פערמינאנטע פארנעם.
מיט גרויס רחמי שמים זעהט מען אין די לעצטע פאר טעג א שטארקע שינוי לטובה, ווען דער רבי שפירט זיך אסאך בעסער ב"ה, און האט דעם שבת געפראוועט געהעריג די תפילות און טישן, בבית האכסניא ביי הנגיד החסיד ר' יעקב אהרן ווערצבערגער הי"ו משב"ק ביי הרה"ק בעל תורת מרדכי מוויזניץ זי"ע, וואו דער רבי האלט זיך אויף די יעצטיגע וואכן לצורך בריאות.
דעם שבת האט דער רבי געדאווענט פארן עמוד אלע תפילות ווי געווענליך, געפירט טיש פרייטאג צונאכטס און שלש סעודות, און אויך געזאגט תורה ביים טיש ליל שבת קודש, ווען עס זעהט זיך אן א שטארקע פארבעסערונג אינעם רבינ'ס מצב. אצינד איז געמאלדן געווארן אז פאר די קומענדיגע פאר טעג וועט זיין פולשטענדיגע זמני קבלת קהל פארן ציבור חסידים, נאך אלע דריי תפילות יעדן טאג, שחרית מנחה און מעריב.
אין די זעלבע צייט האט מען שוין ב"ה אנגעהויבן קלערן אהיימצופארן צוריק קיין לאנדאן צו ווייטער משפיע זיין אויף די חסידים פונדערנאנט, לויט די יעצטיגע פלענער וועט זיך דער רבי שליט"א אומקערן אהיים למעון קדשו אנהייב חודש אלול לקראת ימי הרחמים והרצון, און מיטן אויבערשטנס הילף קענען פראווענען דעם ירח האיתנים בבריות גופא ונהורא מעליא.
