אין ליכט פון די שרעקליכע קריזיס וואס האט באטראפן די ישיבות און כוללים בארץ הקודש, צוליב די גזירה פון גיוס בני הישיבות וואס האט דראסטיש רעדוצירט די רעגירונגס הילף פאר די חרדישע מוסדות, האט כ"ק אדמו"ר מוויזניץ שליט"א אוועקגעשטעלט א פולשטענדיגע קאסע וואס זאל צוהעלפן אלע ישיבות און כוללים דחסידי וויזניץ, און ראטעווען די תורה פעסטונג פון אונטערגיין רח"ל.
פארגאנגענע וואך האט דער רבי שליט"א אפגעשריבן א הארציגע מכתב קודש בכתב יד קדשו, וואו דער רבי אפעלירט צו די חסידים ארויסצוקומען העלפן שאפן די נויטיגע געלטער, יעדער זאל נעמען די זכות פון אויפהאלטן א אינגערמאן פאר א יאר, און זיך באטייליגן ביים דריגענדן אסיפה וואס דער רבי פאררופט.
דער רבי שליט"א שרייבט די בריוו מיט הארץ און געפיל, איבער די שרעקליכע מצב וואס הערשט אויף די ישיבות און כוללים עס זאל חלילה נישט אונטערגיין, מנהמת לבו בעט דער רבי בבקשה ותחינה פון סיי ווער עס האט די מעגליכקייט צו שטיין לימין התורה, נאך וואס די וויי געשריי פון די אינגעלייט און זייערע קינדער גיבט אים נישט קיין מנוחה אין די יעצטיגע צייט.
דער רבי שרייבט אז ער איז פארזיכערט אין די געוואלדיגע תועלת וואס דאס וועט ברענגען, פארן עתיד פון די תורה הקדושה, און דער וואס שטרענגט זיך אן פארמאגט א אייביגער זכות, און מיטן אויבערשטנס הילף וועט אים גארנישט פעלן וזרעו לברכה.
די דריגענדע אסיפה קומט פאר היינט דאנערשטאג, אין די פראכטפולע וויזשאן זאל אין מושב אורה בגלילות ירושלים, וואו דער רבי האלט זיך אויף די יעצטיגע טעג אויף אפרוה. צום אסיפה זענען געלאדנט געווארן אלע חסידים וואס נעמען זיך אונטער דעם איינמאליגן סכום פון צען טויזענט שקל, צוצולייגן א פלייצע פארן דריגענדן קאמפיין אויפצוטרייבן די נויטיגע געלטער להחזקת תורה ולומדיה.
צום היסטארישן קאמפיין זענען מאביליזירט אלע ראשי כוללים וראשי הישיבות פון אלע וויזניצע תורה אינסטוטוציעס לענגאויס ארץ ישראל, וואס וועלן זיכער מאכן אויפצוטרייבן די נויטיגע פאנדן צו קענען ממשיך זיין מיט הרבצת התורה על מי מנוחות.
