מארגן זונטאג איז כ"ק אדמו"ר מוויזניץ שליט"א ערווארטעט ארויסצופארן קיין דייטשלאנד, וואו מען האפט דורכצופירן א געוויסע מעדיצינישע באהאנדלונג אין א גרויסע שפיטאל אין שטאט מינכען, מיטן האפענונג צו פארבעסערן דעם רבינ'ס געזונט צושטאנד, שטייענדיג אין א שווערע יאר וואס דער רבי ווערט באהאנדלט מיט די ביטערע מחלה ה"י.
ווי באקאנט האט דער רבי שליט"א געוויילט פארלאפענעם ווינטער אין לאס אנדזשעלעס פאר עטליכע חדשים, וואו מען האט באהאנדלט דעם רבי'ן מיט גרויס געטריישאפט און דורכגעפירט א מעדיצינישע פראצעדור, וואס איז ב"ה געקרוינט געווארן מיט הצלחה, אבער צוליב דעם וואס די מחלה איז ליידער נאכנישט פולקאם עלימינירט, איז באשלאסן געווארן דורך הויכראנגיגע פראפעסארן צו דורכפירן נאך א פראצעדור, דאסמאל אין מינכען דייטשלאנד, וואו עס איז פארהאן אויסגערופענע ספעציאליסטן אין דעם געביט.
ביים שמחת הבר מצוה און שמחת הווארט וואס איז פארגעקומען דעם מיטוואך אין ביהמ"ד הגדול אין קרית וויזניץ בני ברק, פאר צוויי אייניקלעך ביים רבי'ן די חתני השמחה, האט דער רבי שליט"א אויפגעטרעטן מיט דברות קודש און דערציילט פאר די חסידים איבער די געפלאנטע נסיעה, זאגענדיג אז ער גרייט זיך ארויסצופארן באלד נאך שבת קיין דייטשלאנד, מיטן האפענונג אז עס איז בלויז פאר עטליכע טעג, מ'זאל נאך קענען צוריקקומען פאר שבת בעז"ה.
דער רבי האט געבעטן פון די חסידים אז מען זאל מתפלל זיין לרפואתו, און בעטן ביים בורא כל עולמים עס זאל עושה רושם זיין לטובה.
