תלמידי וחסידי סאטמאר נעמען אויף מיט פרייד די איבערראשנדע מעלדונג, אז צום קומענדיגן שנת הלימודים וועט זיך עפענען א נייע ישיבה אינערהאלב די מעכטיגע אימפעריע פון ישיבות ומוסדות סאטמאר, די נייע "מתיבתא תורה ויראה" וועט זיין געאייגנט פאר די מער עלטערע בחורים, די בוגרי ישיבה גדולה וואס וועלן זיך דארט משלים זיין בתורה ובהוראה נאכן פארענדיגן די שנות הלימודים אין ישיבה גדולה.
די מעלדונג איז גאר פרייליך פאר אלע בחורי הישיבה וואס שליסן די ישיבה גדולה יארן, און זוכן ווייטער א פאסיגע מקום תורה וואו צו קענען עוסק זיין בתורה און פארברענגען אין א ווארעמע חסידישע אטמאספערע, ביז זיי וועלן בעז"ה זוכה זיין אויפצושטעלן א אייגענע שטוב.
די נייע סאטמארע מתיבתא וועט זיך געפונען מחוץ לעיר, צוגעשטעלט מיט א דארמיטארי און אלע צוגעהערן, אלס ראש ישיבה ווערט אויפגענומען הגה"צ ר' שלום גליק שליט"א דומ"ץ טאהש וויליאמסבורג, און אלס מנהל הישיבה וראש חבורת עיון ווערט אויפגענומען הרה"ג ר' יצחק זאב פאזען שליט"א.
נעכטן זונטאג אויפדערנאכט איז פארגעקומען א מסיבת לחיים בביתו נאוה קודש פון כ"ק אדמו"ר מסאטמאר שליט"א אין מחנה דברי יואל, וואו דער רבי האט ווארעם געוואונטשן פאר די עסקנים וחברי ההנהלה, און די נייע אויפגענומען ראש ומנהל הישיבה עס זאל זיך עפענען מיט גרויס הצלחה, ווען אין די יעצטיגע טעג גרייט מען זיך צו עפענען די רעגיסטראציע, צום נייעם שנת הלימודים באלד נאך די קומענדיגע ימים טובים, חודש חשון תשפ"ו.
