נאכפאלגענדיג די אנטוויקלונג אינעם געזונט צושטאנד פון כ"ק אדמו"ר מגור שליט"א, וועלכער איז ל"ע געפאלן דעם שבת און זיך צובראכן די אקסל, צוברענגענדיג שווערע יסורים פארן רבי'ן, איז באשטעטיגט געווארן דורכ'ן רבי'ן און די נאנטע מקורבים אז די שמחת החתונה פון א אייניקל ביים רבי'ן וואס האט געזאלט פארקומען דעם חודש אלול, וועט פארקומען קומענדיגע יאר אין חודש כסלו, מיטן האפענונג אז ביז דעמאלטס וועט דער רבי צוריקקומען צו די כוחות לאיתנו הראשון.
די שמחת החתונה פונעם חתן אברהם מרדכי אלתר נ"י, זון פון בנו חביבו פונעם רבי'ן הגה"צ ר' נחמיה אלתר שליט"א, איז געווען באשטימט אויף דינסטאג פרשת שופטים ב' אלול, אין קארגע צוויי וואכן פון היינט, אצינד אבער ווען דער רבי איז זייער אפגעשוואכט און קען נישט געהעריג באשיינען קיין עפנטליכע מעמדים, איז באשלאסן געווארן צו אפרופן אלע געפלאנטע מעמדים פון די קומענדיגע וואכן, וואס רעכנט אריין א געהויבענע שבת מיט די גרעסערע תומכים פונעם קרן מוסיף והולך, וואס האט געזאלט פארקומען דעם שבת פרשת עקב אין מושב אורה.
מטעם דעם רבינ'ס שטוב און די וועד העסקנים, איז באשטימט געווארן אז די שמחת החתונה וועט פארקומען קומענדיגן חודש כסלו הבעל"ט, דאנערשטאג פרשת ויצא, ווען בעז"ה וועט דער ראש בית אב כ"ק אדמו"ר מגור שליט"א קענען באשיינען די שמחה מיט פולע כוחות, מיט די באטייליגונג פון טויזענטער חסידים איבער די גאנצע וועלט.
