מטעם ביתו נאוה קודש פון כ"ק אדמו"ר מוויזניץ שליט"א איז געמאלדן געווארן די פאזיטיווע אנטוויקלונג, אין די צייט וואס דער רבי שליט"א האלט זיך אויף אין דייטשלאנד לצרכי רפואה, אז מיט די פאזיטיווע פארשריט ב"ה איז באשטעטיגט געווארן אז דער רבי שליט"א וועט זיך אומקערן אהיים קיין ארץ ישראל בעפאר שבת קודש הבעל"ט.
דער רבי שליט"א איז ארויסגעפארן קיין דייטשלאנד דעם זונטאג אינדערפרי, און מאנטאג אינדערפרי איז דורכגעפירט געווארן א מעדיצינישע פראצעדור אין א גרויסע שפיטאל אין מינכען דייטשלאנד, וואו די דאקטוירים און הויכראנגיגע פראפעסארן האבן באהאנדלט דעם רבי'ן אין ליכט פון די שווערע מחלה וואס פלאגט דעם רבי'ן די לעצטע יאר צייט.
בחסדי ה' איז די פראצעדור אריבער מיט הצלחה, און ווי די דאקטוירים זאגן זעהט מען שטארקע פארשריט צו באקעמפן די מחלה מיטן אויבערשטנס הילף. אצינד גרייט מען זיך שוין צום פליגער רייזע אהיים, ווען דער רבי וועט זיך ארויסלאזן פרייטאג צופרי מיט א פריוואטע פליגער אהיים קיין ארץ ישראל, און אויף שבת קודש וועט דער רבי וויילן בביתו נאוה קודש אין קרית וויזניץ בני ברק, אויף א פארמאכטע פארנעם בלויז מיט די נאנטע מקורבים.
