מיט כמעט א יאר פארביי, שטייט מען שוין געציילטע טעג בעפאר די ערשטע הילולא קדישא פון כ"ק אדמו"ר הרה"ק בעל ישועת יעקב מסקולען זי"ע, וועלכער איז נסתלק געווארן לגנזי מרומים לדאבון לב כל בית ישראל, ביום המר ה' אלול תשפ"ד.
זיך גרייטענדיג אצינד צום ערשטן יארצייט, איז באשטעטיגט געווארן אז די גרויסארטיגע סעודת הילולא ברוב עם הדרת מלך, וועט פארקומען אין די עטרת חי' זאלן אין בארא פארק, בליל ההילולא קומענדיגע וואך דאנערשטאג נאכט, אין שפיץ פון די קינדער ממשיכי דרכו בקודש, כ"ק אדמו"ר מסקולען שליט"א, און כ"ק אדמו"ר מישועת יעקב סקולען שליט"א.
ועל צבאם איז ערווארטעט די השתתפות פון די ברידער כ"ק האדמורי"ם שליט"א לבית סקולען, און א ריזן ציבור חסידים ואנשי מעשה פון נאנט און ווייט, וואס וועלן זיך צוזאמקומען צו פראווענען די הילולא קדישא און זיך ווארעמען במשנתו הטהורה פונעם בעל ההילולא. באלד נאכן יארצייט טיש כחצות הלילה וועט מען ארויספארן ברוב עם קיין מאנסי, צו פוקד זיין דעם ציון הק' בעצם ליל ההילולא קדישא להיפקד בדבר ישועה ורחמים.
אין די זעלבע צייט גרייטן זיך חסידי בית סקולען אין בארא פארק, מקבל צו זיין בהדרת כבוד רבם ומאורם כ"ק אדמו"ר מסקולען שליט"א, וועלכער איז ערווארטעט זיך אריבערצוציען לעיר כהונתו אין בארא פארק אין די קומענדיגע טעג, ממקום מושבו ביז היינט אין שטאט מאנסי. די קומענדיגע שבת קודש וועט געפראוועט ווערן די שבת הילולא קדישא פון הרה"ק בעל נועם אליעזר מסקולען זי"ע, און די שבת בעפאר די ערשטע הילולא קדישא פון נכדו ממלא מקומו כ"ק אדמו"ר בעל ישועת יעקב זצ"ל.
