שטייענדיג אין סאמע ברען פון די מאסיווע בוי ארבעט צו גענצליך איבערבויען די נאסטאלגישע פשעווארסקער בית המדרש אין אנטווערפן, וואס ווערט אין די טעג פראכטפול אהערגעשטעלט מיט א גרויסע היכל לתורה ולתפילה, וואו די טויזענטער חסידים זאלן זיך קענען מסתופף זיין בצל הקודש פון כ"ק אדמו"ר מפשעווארסק שליט"א, מיט עטוואס מער הרחבת הדעת ווי ביז היינט, גרייט מען זיך אויף א אייגענארטיגע שבת וואס דער רבי שליט"א וועט פראווענען אויסשליסליך מיט די נדיבי לב תומכי קרן הבנין.
די רעדע איז פון א קבוצה תומכים און נדיבים וואס שליסן זיך אן מיט די פאנטאסטישע סומע פון א פערטל מיליאן דאללער, און זענען געלאדנט געווארן צו מיטהאלטן א זעלטן היסטארישע שבת, וואס וועט פארקומען אינעם רבינ'ס קור ארט, אין די שטעטל ניס אין פראנקרייך, וואו דער רבי האלט זיך אויף דורכאויס די זוממער וואכן אויף אפרוה.
נעכטן מיטוואך זענען אנגעקומען קיין פראנקרייך א קבוצה נכבדה פון ארום דרייסיג נגידים ושועים, אויף א לעכטיגע נסיעה לצדיק להסתופף בצל הקודש, צו האבן די זכיה להסב על שולחן מלכים פאר עטליכע טעג נאכאנאנד, די אכסניות זענען געווארן אהערגעשטעלט מיט פראכט און כבוד אינעם רבינ'ס געגנווארט, און שוין נעכטן האט מען געהאט די זכיה צו מיטהאלטן די ספעציעלע יארצייט טיש ביומא דהילולא קדישא פון הרה"ק מסאטמאר זי"ע, וואס דער פשעווארסקער רבי שליט"א האט געפראוועט אינאיינעם מיט די נדיבים בעם.
היינט דאנערשטאג קומט פאר א התעוררות'דיגע מעמד תפילת יום כיפור קטן, לרגל ערב ראש חודש אלול מוקדם, און עס וועט נאכפאלגן מיטן קלימאקס, די געהויבענע שבת קודש פרשת ראה מברכים חודש אלול בצל הקודש. זונטאג וועט דער רבי שליט"א דאווענען אינאיינעם מיט די חשובע געסט לכבוד ראש חודש, און אזוי אויך וועט יעדער האבן די געלעגנהייט אריינצוגיין פריוואט אל הקודש פנימה לקראת די ימי הרחמים והרצון.
