פון ארץ ישראל הערט מען היינט גוטע נייעס ב"ה, אז כ"ק אדמו"ר מבעלזא שליט"א איז אריבער אן אפעראציע היינט מיט גרויס הצלחה, און די דאקטוירים זענען העכסט צופרידן פון די פאזיטיווע אנטוויקלונגען ב"ה.
ווי באריכטעט איז כ"ק אדמו"ר מבעלזא שליט"א אפגעפירט געווארן אין שפיטאל בעפאר שבת, נאך וואס דער רבי האט געליטן שווערע יסורים אויף די פיס און נאך פארשידענע קאמפליקאציעס. דורכאויס שבת האט דער רבי מיטגעהאלטן די תפילות און סעודות שבת מיט א ענגע מנין פון די נאנטע מקורבים און בני המשפחה, ווען פארן עמוד דאווענט בנו יחידו פונעם רבי'ן הגה"צ ר' אהרן מרדכי רוקח שליט"א.
נאכן דורפירן די נויטיגע אונטערזוכונגען, האבן די דאקטוירים און הויכראנגיגע פראפעסארן אין די הדסה שפיטאל דורכגעפירט היינט מיטאג א לייכטע אפעראציע צו פארגרינגערן די שווערע יסורים, און מיט גרויס רחמי שמים הערט מען ב"ה אז אלעס איז אריבער מיט הצלחה. פונעם רבינ'ס שטוב האבן די גבאים איבערגעגעבן פאר די חסידים צו מתפלל זיין פארן רבי'נ'ס געזונט און די פרישע אנטוויקלונגען, און אצינד האפט מען צו הערן ווייטערדיגע גוטע בשורות ביז דער רבי וועט זיך קענען אומקערן אהיים בבריות גופא ונהורא מעליא.
אידישע קינדער זענען ווייטער מתפלל פארן רבינ'ס געזונט, כ"ק מרן ישכר דוב בן מרים בתוך שאר חולי ישראל.
