היינט זונטאג איז כ"ק אדמו"ר מגור שליט"א אריינגעפארן צו די הדסה שפיטאל אין ירושלים, נאך וואס עס איז אנטוויקלט געווארן א רייע קאמפליקאציעס מיטן רבינ'ס געזונט, וואס האט געפירט דערצו אז דער רבי זאל זיך מוטשענען מיט די אטעם רח"ל.
ווי באקאנט איז דער רבי שליט"א אומגעפאלן מיט דריי וואכן צוריק, זייענדיג אויף שבת אין מושב אורה נעבן ירושלים, דער רבי האט זיך דאן צובראכן די אקסל ביין, און צוליב דעם האט דער רבי געמוזט פארבלייבן אינדערהיים דורכאויס די גאנצע תקופה, און באהאנדלט ווערן אויף פארשידענע וועגן.
ליידער האט דאס צוברענגט א פרישע קאמפליקאציע, ווען דעם רבינ'ס אטעם איז שווער געווארן צוליב פראבלעמען אין די לונגען. היינט זונטאג איז דער רבי אריינגעפארן צו די הדסה שפיטאל אויף אונטערזוכונגען, וואו עס איז באשטעטיגט געווארן אז דער רבי ליידט פון א שווערע לונגען אנטצינדונג. אצינד האפט מען אז מיט די נויטיגע באהאנדלונגען וועט דער רבי שליט"א בעז"ה צוריקקומען צו די כוחות לאיתנו הראשון, און זיך קענען צוריקקערן אהיים ווי אמשנעלסטן.
אידישע קינדער זענען ווייטער מתפלל פארן רבינ'ס געזונט, כ"ק מרן יעקב ארי' בן יוטא הענא בתוך שאר חולי ישראל.
