אלפי חסידי וויזניץ האבן היינט אינדערפרי אויפגענומען מיט דערלייכטערונג די בשורה טובה, אז כ"ק אדמו"ר מוויזניץ שליט"א לרפואה שלימה וועלכער איז געווען שפיטאליזירט זינט דעם מוצאי שבת, איז ב"ה באפרייט געווארן פון שפיטאל, און האט זיך אומגעקערט לבית האכסניא אין מושב אורה, וואו דער רבי האלט זיך אויף די יעצטיגע תקופה לצורך מנוחה.
ווי באריכטעט איז דער רבי שליט"א גענומען געווארן אין שפיטאל דעם מוצאי שבת, נאך א ערנסטע שוואכקייט וואס איז באפאלן דעם רבי'ן, די דאקטוירים אין די הדסה שפיטאל האבן דורכגעפירט די נויטיגע אונטערזוכונגען און באשטעטיגט אז דעם רבינ'ס מצב הבריאות איז ב"ה בסדר, אבער דער רבי דארף רוען צו קענען צוריקקומען צו די כוחות, און זיך ערהוילן פון די ביטערע מחלה ה"י וואס פלאגט דעם רבי'ן אין לויף פון די פארלאפענע יאר.
היינט איז געמאלדן געווארן פאר אלפי חסידי וויזניץ די בכל אתר ואתר, אז אין ליכט פונעם רבינ'ס געזונט צושטאנד, ווען דער רבי איז אנגעוואנדן אויף שעות מנוחה און קען זיך נישט איבערשטרענגען, איז צוריקגעריקט געווארן די צייט פון אמירת סליחות הראשונות דעם קומענדיגן מוצאי שבת קודש ליל א' סליחות. אנדערש ווי געווענליך ווען מען שטעלט זיך זאגן סליחות סמוך לחצות הלילה, וועט דער רבי שליט"א זאגן סליחות דאס יאר מיט צוויי שעה פריער, שוין האלב נאך צען ביינאכט, אין ביהמ"ד הגדול אין קרית וויזניץ בני ברק, ברוב עם הדרת מלך.
לויט די הוראה פון די דייני הקהילה, האט מען קלארגעשטעלט אז דאס איז א הוראת שעה צוליב דעם רבינ'ס געזונט צושטאנד, און עס איז בלויז פארן רבינ'ס מנין בבנין ביהמ"ד הגדול. אנדערש איז אבער אין די אנדערע בתי מדרשים דחסידי וויזניץ, און אזוי אויך פאר די אנדערע סליחות נעכט אין אנדערע געלעגנהייטן, וואס די מנהג פון זאגן סליחות בלייבט ווייטער נאך חצות הלילה.
