צום נייעם שנת הלימודים אינעם מבצר המוסדות באבוב 45, האט דער רבי שליט"א געמאלדן אז די ישיבה קטנה וועט ווערן איינגעטיילט אין צוויי, אלס צוויי באזונדערע ישיבות, מיט א באזונדערע שטאב און באזונדערע בניינים. דער גרויסער עקזעסטירנדע בנין הישיבה קטנה גייט אצינד דורך א פולע איבערבוי, און ווערט צוטיילט אין צוויי באונזערע געביידע'ס.
פארלאפענעם שבת קודש פרשת כי תצא ביי שלש סעודות, האט דער רבי שליט"א ביים סוף פון די דברי תורה קורא שם געווען פאר די צוויי ישיבות, איינס אלס ישיבת תפארת שלמה און דאס צווייטע אלס ישיבת קדושת שלמה.
דער רבי שליט"א האט ערווענט אז היות דער שווער הרה"ק מבאבוב זצ"ל האט געלאזט צוואה אז מ'זאל נישט קובע זיין זיין נאמען אויף קיין שום מוסד, איז מען מקיים זיין צוואה מיטן רופן די מוסדות הקדושים על שם אביו הגדול, דעם זיידן הרה"ק מבאבוב זצ"ל. דער נאמען תפארת שלמה האט דער רבי ערקלערט איז צוליב דעם וואס דאס איז דער נאמען וואס דער שווער זצ"ל האט א נאמען געגעבן דעם כולל אין לאנדאן נאך זיין גרויסן טאטן זצ"ל.
דאן האט דער רבי ממשיך געווען אז דער נאמען קדושת שלמה האט מציע געווען דער שוואגער הגה"צ אבד"ק באבוב 45 שליט"א, און טראץ וואס מען טאר נישט א נאמען געבן נאכן שווער זצ"ל, איז אבער שמו הק' מרומז אויף עטליכע וועגן אינעם נאמען "קדושת שלמה" דורך א גימטריא, און אזוי אויך זענען מרומז אין דעם נאמען די אנדערע צדיקי בית באבוב, בעל קדושת ציון הי"ד און זיין פאטער דער ערשטער באבוב'ער רב זצ"ל.
