נעכטן מאנטאג נאכמיטאג איז דער ניו יארק סיטי מעיאר עריק עדעמס אנגעקומען אויף א באזוך צו די היימישע געגנט אין בארא פארק, אין ראם פון זיין יערליכע באזוך אין די היימישע געגנטער בעפאר די ימים טובים סעזאן, וואס נעמט אריין ספעציעלע זיצונגען מיט אידישע עסקנים און באזוכן ביי ספעציעלע ערטער.

צום הויכפונקט פון די באזוך איז דער מעיאר אנגעקומען צום נייעם גיגאנטישן ביהמ"ד מרכז העולמי באבוב 45, וואס ווערט פארענדיגט אין די טעג און וועט בעז"ה באנייעט ווערן דעם קומענדיגן שבת קודש פרשת נצבים, נאך גאנצע צוואנציג יאר וואס אלפי חסידי באבוב 45 קוקן ארויס אויף דעם מאמענט, און א שיינע פאר יאר פון העפטיגע בוי ארבעט אין הארץ פון שטאט, ביים ווינקל פון די פערצנטע עוועניו און די ניין און פערציגסטע סטריט.

כ"ק אדמו"ר מבאבוב 45 שליט"א וועלכער איז דאן געווען אנוועזנד אינעם בנין ביהמ"ד אויף א לענגערע באזוך, האט פערזענליך באגריסט דעם מעיאר, און ארומגעוויזן דעם הערליכן בנין אינאיינעם מיט די ראשי העסקנים וואס האבן געפירט דעם ריזן בוי פראיעקט, דער מעיאר האט אויסגעדרוקט גרויס וואונדער צום גיגאנטישן און הערליכן בנין בית המדרש און פארשפראכן צו שטיין ווייטער צו די רעכטע האנט אין יעדע טריט און שריט.