אין די יעצטיגע טעג גרייט מען זיך אויף א געהויבענע שמחה בחצרות הקודש וויזניץ, ווען די ברידער כ"ק האדמורי"ם מוויזניץ שליט"א פון וויליאמסבורג און מאנטריאל, וועלן אינאיינעם מפאר זיין על ראש שמחתם ביי די חתונה פון זייערע אייניקלעך, און וועט פארקומען אויפן קאנאדישן באדן אינעם עיר ואם בישראל מאנטריאל.
די חתן איז א זון פון הגה"צ ר' חיים מאיר הורוויץ שליט"א דומ"ץ דקהל תורת חיים וויזניץ אין וויליאמסבורג, עלטסטע איידעם פון כ"ק אדמו"ר מוויזניץ שליט"א פון וויליאמסבורג. די כלה איז א טאכטער פון הגה"צ ר' לייבוש טויב שליט"א, זון פון הגה"צ ר' ישכר דוב טויב שליט"א אבד"ק זכרון נפתלי ארי' נעשכיז, און א איידעם ביי זיין פעטער כ"ק אדמו"ר מוויזניץ שליט"א פון מאנטריאל.
די גרויסע חתונה וועט פארקומען דעם דאנערשטאג פרשת לך לך בחצר הקודש וויזניץ אין מאנטריאל, די גרויסע שארית ישראל זאל איז געווארן ארויסגעדינגען מיט אלע אפטיילונגען, און וועט דינען אלס אכסניא פאר די שמחה הרוממה.
איבערהויפט גרייט מען זיך צו די געהויבענע מסע הקודש וואס כ"ק אדמו"ר מוויזניץ שליט"א פון וויליאמסבורג נעמט אונטער קיין מאנטריאל קאנאדע צו באשיינען די שמחה, אינאיינעם מיט א גרויסע סוויטע חסידים ואנשי מעשה, הונדערטער אינגעלייט און בעלי בתים און די בחורי הישיבות פון וויליאמסבורג און בלומינגראוו, אין ראם פון די געהויבענע נסיעה וועט געפראוועט ווערן א גרויסן שבת אין מאנטריאל, בצל הקודש פון די צוויי ברידער האדמורי"ם שליט"א, אינאיינעם מיט די שבת של שמחה די שבת שבע ברכות אין ביהמ"ד הגדול וויזניץ אין מאנטריאל.
דער וויזניצער רבי פון וויליאמסבורג וועט אנקומען קיין מאנטריאל דעם מיטוואך, און וועט האבן די אכסניא אין שטוב פון הנגיד החסיד ר' שמואל פישמאן הי"ו, לאנגיעריגער בעל אכסניא פון אדמור"י בית וויזניץ. מיטוואך אויפדערנאכט וועט פארקומען די שמחת החתן מאהל אין ביהמ"ד הגדול וויזניץ, און דורכאויס די באזוך וועט דער רבי שליט"א דאווענען די תפילות אין וויזניצע בית המדרש, און אויפנעמען דעם ציבור חסידים מיט קוויטלעך לכבוד די ימי השמחה.
היינט מאנטאג וועט דער וויזניצער רבי פון וויליאמסבורג אנקומען קיין מאנסי צו פוקד זיין דעם ציון הק' פון אביו הגדול הרה"ק בעל תורת מרדכי מוויזניץ זי"ע לכבוד די שמחה, און וועט נאכפאלגן מיט זמני קבלת קהל אין שטוב פון הנגיד החסיד ר' הערשל גרינבוים הי"ו.
פארגאנגענע וואך איז דער וויזניצער רבי פון מאנטריאל געווען צוגאסט אין ניו יארק, לכבוד די שמחת החתונה בבית גיסו הגה"צ ר' משה יחיאל איליאוויטש שליט"א, און לכבוד די שמחת החתונה במעונו פונעם רבינ'ס בעל אכסניא אין מאנסי הנגיד החסיד ר' חיים מאיר ציג הי"ו. דורכאויס די באזוך אין ניו יארק האט דער רבי פוקד געווען דעם ציון הק' פון אביו הגדול הרה"ק בעל תורת מרדכי מוויזניץ זי"ע לכבוד די שמחה, און אויפגענומען די חסידים מיט קוויטלעך לקראת די ימי השמחה.
נאכן שבת שבע ברכות וועט דער וויזניצער רבי פון וויליאמסבורג זיך אומקערן אהיים קיין ניו יארק, און מאנטאג אויפדערנאכט וועט פארקומען די צענטראלע שבע ברכות אין ביהמ"ד הגדול וויזניץ אין וויליאמסבורג, וואו עס וועט זיך אויך באטייליגן דער געהויבענער זיידע דער וויזניצער רבי פון מאנטריאל, וועלכער וועט קומען קיין ניו יארק באשיינען די שמחות השבע ברכות במעון קדשו.
אין די יעצטיגע טעג איז אקטיוו א העפטיגע הכנסת אורחים אונטערנעמונג דורך די עסקנים פון די וויזניצע קהילות אין מאנטריאל און וויליאמסבורג, וועלכע ארבעטן אינאיינעם צוצושטעלן אש"ל מלא פאר די פילע געסט וואס קומען קיין מאנטריאל מיטהאלטן די געהויבענע ימי השמחה, עס ווערט צוגעשטעלט צו שלאפן אין די בנינים פון די וויזניצע מוסדות אין מאנטריאל, און די סעודות ביד רחבה אינעם בנין ביהמ"ד און אין די סקווירא זאל.
