כ"ק אדמו"ר מזוועהיל שליט"א גרייט זיך אין די יעצטיגע טעג ארויסצופארן אויף א נסיעה קיין אמעריקע, אויפצוטרייבן סכומים אדירים למען החזקת מוסדותיו הקדושים, די זוועהילער מוסדות און די ישיבה הקדושה וואס פיגורירט לשם ולתפארת אין די בית ישראל געגנט אין ירושלים.
דער רבי שליט"א נעמט אונטער די נסיעה אין די יעצטיגע וואכן, צו באשיינען די שמחת החתונה במעון הקודש פון זיין שוואגער כ"ק אדמו"ר מראחמיסטריווקא שליט"א פון ספרינג וואלי, וועלכער מאכט חתונה בתו הכלה די קומענדיגע וואך אין א מזל'דיגע שעה.
זייענדיג צוגאסט אין ניו יארק, וועט דער רבי שליט"א אין א ערשטמאליגע שריט מיטהאלטן א שבת בצל הקודש פון זיין עלטער פעטער כ"ק אדמו"ר מסקווירא שליט"א, וואס ווי באקאנט איז דער רבי אן איידעם ביי הגה"צ ר' מרדכי טווערסקי זצ"ל, בנו הגדול פון כ"ק אדמו"ר הרה"ק מראחמיסטריווקא זצ"ל, וועלכער איז געווען אן איידעם ביי הרה"ק מסקווירא זי"ע.
דער זוועהילער רבי שליט"א וועט זיין צוגאסט אין שיכון סקווירא דעם קומענדיגן שבת קודש פרשת לך לך, און וועט מיטהאלטן אלע תפילות און טישן בצל הקודש פונעם סקווירא רבי'ן, די אכסניא וועט זיין אין שטוב פון הגה"צ רבי אהרן מענדיל טווערסקי שליט"א בנו הגדול פונעם סקווירא רבי'ן.
