א היסטארישע הכרזה איז דעם שב"ק אויסגערופן געווארן בהיכל בית המדרש ראחמיסטריווקא אין מאנסי, ווען עס איז איבערגעגעבן געווארן די פריידיגע בשורה אז דער רבי שליט"א האט נאך פינף חדשים צוגעשטימט אנצונעמען דעם כתר האדמורו"ת.
דער רבי שליט"א וועלכער איז דער עלטסטער זון פון הרה"צ ר' מרדכי טווערסקי זצ"ל, בנו בכורו פון כ"ק אדמו"ר הרה"ק מראחמיסטריווקא זי"ע, איז אן איידעם ביי זיין דאפלטער עלטער פעטער כ"ק הגה"צ אבד"ק ראחמיסטריווקא מאנסי שליט"א. נאכן הסתלקות פון הרה"ק מראחמיסטריווקא זי"ע האבן די חסידים אין מאנסי מפציר געווען ביים רבי'ן שליט"א אנצונעמען דעם כתר האדמורו"ת, זייענדיג דער לאנגיעריגער משפיע בבית מדרשו פון זיין גרויסן שווער דער ראחמיסטריווקא רב שליט"א. אזוי אויך האבן זיינע פעטערס כ"ק האדמורי"ם מראחמיסטריווקא שליט"א שטארק מפציר געווען ביים רבי'ן ער זאל אננעמען די ראביסטעווע, אבער מרוב ענוותנותו האט ער עס אלס אפגעשטיפט.
דעם שבת פאר קריאת התורה האט הרה"ג ר' יצחק אהרן מאריס שליט"א מחשובי רבני הקהילה אויפגעטרעטן אין נאמען פונעם רבי'ן שליט"א, אז דער רבי איז נעתר געווארן לבקשתם פון די חסידים, און איז מסכים אנצונעמען דעם כתר האדמורו"ת און ווייטער ממשיך זיין דעם גאלדענעם קייט. דערביי האט ער מוסיף געווען אז למען השלום האט דער רבי געבעטן מען זאל אים רופן "דער ראחמיסטריווקא רבי פון ספרינג וואלי", און נישט דער ראחמיסטריווקא רבי פון מאנסי, אין די צייט וואס די קהילה און מוסדות זאל אלעס ווייטער בלייבן אזוי ווי ביז היינט.
נעכטן מוצאי שב"ק האט דער רבי אויפגעטרעטן מיט קורצע דברות קודש ביי די וועכנטליכע מלוה מלכה מיט די באטייליגונג פון הונדערטער אידן, דער רבי האט ערווענט זיינע קווענקלענישן אנצונעמען דעם כתר האדמורו"ת, אבער ער זעט פשוט נישט יעצט קיין אנדערע אויסוואל.
