היינט דינסטאג איז די צאנזער בית המדרש אין מאנסי איינגעווארפן געווארן, אריינגייענדיג אין דעם מאסיווע פראיעקט אויפצובויען א נייע גרויסע בית המדרש פאר כלל חסידי צאנז אין שטאט מאנסי, נאך וואס די ביז יעצטיגע בית המדרש איז געווען היבש קליין, און האט נישט געקענט פארנעמען דעם גרויסן ציבור בליעה"ר.
מיט עטליכע וואכן צוריק איז געווען צוגאסט אין ניו יארק דער רב הקהילה הגה"צ אב"ד צאנז ארה"ב שליט"א זון פון כ"ק אדמו"ר מצאנז שליט"א, און דערביי איז געווארן אויפגעטריבן די פאנטאסטישע סומע פון העכער א מיליאן דאללער, בלויז פון די חברי הקהילה און מתפללי בית המדרש, צו קענען צוטרעטן אין א מזל'דיגע שעה צו די מאסיווע בוי ארבעט.
אין די לעצטע פאר וואכן האט מען שוין אנגעהויבן מיט די ארבעט צו אויפרייניגן דעם שטח הביהמ"ד אויף סוזען, אין די צייט וואס די קהילה האט זיך איינקוואטירט אויף צייטווייליג אין די בנין פון ישיבה קטנה ד'סאטמאר אויף מעיפל בנין קעסטנבוים, היינט דינסטאג איז פאקטיש איינגעווארפן געווארן די עקזיסטירנדע געביידע, און די ארבעט גאלאפירט פאראויס אויף א שנעלן טעמפא, צו פארענדיגן דעם נייעם בית המדרש לשם ולתפארת.
