א בליק אריין אונטער די קוליסן אין די 'קרן יד עלקא' אונטער די 'טובה וברכה' ארגענעזאציע וואס האט פארטיילט איבער 200 מיליאן דאלער אין צדקה דורכאויס די לעצטערע יארן.
נישט צופיל מענטשן האבן שוין געהערט פון די ארגענעזאציע "טובה וברכה" אדער דער שוועסטער-ארגענעזאציע "יד עלקא חלוקות יום טוב", אבער דאס איז אייגנטליך א טייל פון די געוואלדיגע חידוש פונעם ארגענעזאציע אז עס איז ספעציעל אויסגעשטעלט געווארן אן קיין גרויסע פאמפע.
טובה וברכה איז אן אפעראציע וואס אפערירט פיל גרעסער און ברייטער ווי דער גרעסטער צדקה ארגענעזאציע אין די וועלט, און אירע גרינדער און מיטגלידער האבן ספעציעל אויסגעקליבן צו זיין אויסבאהאלטן כדאי צו היטן אויף די כבוד פון די געניסער.
דער ארגענעזאציע פארמאגט א צאל גראנדיעזע פראיעקטן, וואס יעדע איינס דערפון וואלט געווען גענוג עס צו פארוואנדלען אין א וועלט בארימטע ארגענעזאציע, און די קאסטן פון אירע פילע פראיעקטן דערגרייכן צו צענדליגער מיליאנען. דאס זעלביגע איז מיט יד עלקא, וואס טוט פארטיילן יעדע פסח און תשרי חלוקות פאר ארימע פאמיליעס און 41 שטעט לענגאויס ארץ ישראל, און ספעציעל אין אזעלכע פארשטופטע געגנטער ווי יארן לאנג זענען אנדערע נישט אנגעקומען אהין, און די קאסטן פון בלויז די חלוקות דערגרייכן די אסטראנאמישע סומע פון פופציג מיליאן דאלער יערליך.
נאך א וואקסנדע פראיעקט אונטערן נאמען "קרן מוקיר שבת" טוט צושטעלן 500 שקל א וואך פאר טויזנטער בני תורה מיט גרויסע פאמיליעס, אז זיי זאלן קענען איינקויפן לכבוד שבת, און די קאסטן דערפון דערגרייכט אויך אין די צענדיגער מיליאנען.
דער ארגענעזאציע פארמאגט אויך א מיסיע מיטן נאמען "חסדי משה טובי'" וואס טוט טיילן טויזנטער שקלים פאר איבער 6,500 פאמיליעס פון אלמנות און יתומים צושפרייט אין איבער 80 שטעט און דערפער לענגאויס ארץ ישראל.
די אלע פראגראמען פון טובה וברכה טוען יערליך באלייכטן די שטובער פון אזויפיל ווי א פערטל מיליאן אידן וועלכע געפונען זיך אין נויט. וואס אפגעזען זייער הונטערגרינד אדער קרייז וועט מען אויסשטרעקן א האנט פון הילף פאר די באטראפענע.
ווערט פירט אויס דעם מיסיע?
בשעת וואס די קאסטן פון דעם אסטראנאמישע צדקה קאסע ווערט געדעקט דורך כלל ישראל'ס מערסט באקאנטע פילאנטראפן און בעלי צדקה, ווערן די אפעראציעס אליין אויסגעפירט דורך אן ארמי פון עסקנים וועלכע געבן זיך אפ מיט די צאללאזע אפליקאציעס און פארזיכערן אז די געלטער דערגרייכן די מענטשן וועלכע דארפן צוקומען דערצו שנעל און גרינג.
דעם פארלאפענעם וואך זענען זיך צוזאמגעקומען די 1,237 אומבאצאלטע גבאים פון אלע עקן פון ארץ ישראל וועלכע פארפיגן אויף די געוואלדיגע חסד פראגראמען, פאר א מאסיווע אוונט פון חיזוק און הכרת הטוב פאר זייערע אומערמידליכע פעולות.
ביי דעם היסטארישער מעמד, האבן זיך באטייליגט גדולי ישראל, פילאנטראפן, און די אנפירער פונעם ארגענעזאציע, וואס האבן האבן אויסגעדרוקט די חשיבות פון די העלדישע עסקנים וועלכע ארבעטן רונדע דעם זייגער צו פארגרינגערן אידישע קינדער לענגאויס ארץ ישראל ללא שום תשלום גמול.
עס איז ארויסגעברענגט געווארן וויאזוי בלויז מיט די הילף פון די געטרייע גבאים און עסקנים האט "טובה וברכה" אינאיינעם מיט "יד עלקא" מצליח געווען צו אוועקשטעלן א קרעדיט קארטל סיסטעם, אונטער וועלכע די שטיצע ווערט געגעבן אויף אומשולדיג אויסזעענדע קרעדיט קארטלעך וואס די נויטבאדערפיגטע קענען פשוט נוצן אינעם געשעפט איינצוקויפן אלע זייערע געברויכן בדרך כבוד, אן דעם וואס זיי זאלן אויסקוקן אנדערש ווי דעם געווענליכער איינקויפער.
די ליסטע פון דעם ארגענעזאציעס נומערן זאגן דעם געשיכטע פאר זיך אליין. אין ביתר עילית האט מען געשטיצט אזויפיל ווי 37,319 נצרכים, אין טברי' 7,702… נאנט צו פערטל מיליאן נצרכים אין יעדע שטאט אדער געגנט וואו אידן וואוינען.
לויט די לעגאלע דאקומענטן זעט מען אז דער ארגענעזאציע האט פארטיילט דעם אומגלויבליכע סומע פון 208 מיליאן דאלאר דורכאויס די לעצטע פאר יאר... דאס קומט אויס נאנט צו פערטל ביליאן דאלאר פאר קריטיש וויכטיגע הילף און חסד פון אן ארגענעזאציע וואס פילע מענטשן האבן נאך קיינמאל געהערט דערפון! בלויז דעם פארלאפענעם למספרם יאר איז פארטיילט געווארן איבער דריי הונדערט מיליאן שקל.
אלזא, די איבער טויזנט-צוויי-הונדערט גבאי צדקה זענען די וואס פארזיכערן אז די אסטראנאמישע סומעס דערגרייכן די ריכטיגע הענט, און אז עס ווערט פארשפרייט מיט הארץ און געפיל פאר יעדער איד איבער גאנץ ארץ ישראל וואס שטרעקט אויס א האנט פאר הילף.
מעמד הכרת הטוב
דער מעמד הכרת הטוב איז פארגעקומען אין א פראכטפולער זאל אינדרויסן פון ירושלים, מיט די באטייליגונג פון פילע גדולי ישראל, וועלכע זעען פון דער נאנט די געוואלדיגע הילף וואס גייט ארויס פון דעם ארגענזאציע.
ביי דעם מעמד איז ארויסגעברענגט געווארן די שווערע ארבעט פון די געטרייע עסקנים, און ספעציעל פונעם גרינדער העסקן הרה"ח ר' יואל ישראל זופניק הי"ו פון ברוקלין וואס לייגט אריין שווערע כוחות אויפצוטרייבן די צענדליגער מיליאנען דאלערן צו דעקן דעם ריזן בודזשעט
די בעלי דרשנים האבן ארויסגעברענגט די ארבעט פון די גבאים, און איבער די פארשידענע פראגראמען און אפטיילונגען פון דעם געוואלדיגע ארגענעזאציע.
נאכן הערן רירנדע דרשות, און הנאה האבן פון הארציגע מוזיקאלישע פרעזענטאציעס, זענען די גבאים פון איבער גאנץ ארץ ישראל ארויסגעגעגאנגען אין א פאראייניגטע טאנץ צו דאנקען דעם באשעפער פאר זייער געוואלדיגע זכות צו שפילן א ראלע אין דעם ארגענעזאציע "טובה וברכה" וואס איז א ריכטיגע רעוואלוציע אינעם פעלד פון חסד.
מי כעמך ישראל
