אין א היסטארישע שריט זענען זיך היינט דינסטאג מיטאג לסדר "ויושע השם ביום ההוא את ישראל", צוזאמען געקומען אדמורי"ם רבנים און ראשי ישיבה פון די גרעסטע קהילות הקדושות איבער גרעיטער ניו יארק און ניו דזשערזי, צו דורכטון דעם עתיד ברוחניות ובגשמיות פון די קינדער וועלכע די גואטמאלא רעגירונג האט ארויס געראטעוועט פון לב טהור.
די אסיפה איז פארגעקומען בביתו נאוה קודש פון כ״ק אדמו״ר ממונקאטש שליט״א אין בארא פארק.
א שטילקייט האט געהערשט ווען הגאון רבי חיד״ו ווייס שליט״א, דומ״ץ סאטמאר אנטווערפן, האט איבערגעבן א באריכט פון דעם שוידערליכן מצב וואס קומט פאר דארט, דער רב שליט״אננהאט דארט באזוכט צוויי מאל אין די לעצטע תקופה וואו ער האט גערעדט און פארברענגט מיט די קינדערלעך און דערציילט שוידערליכע פאקטן.
דער רב שליט״א האט דערציילט איבער ווייטערדיגע פלענער וועלכע דארפן האבן כובד ראש, צו זען דעם ריכטיגן דרך ווי אזוי מען קען פארזיכערן דעם עתיד פון די קינדער ברוחניות ובגשמיות.
העסקן הרב משה דוד נידערמאן הי״ו האט איבערגעגעבן א באריכט פונעם לעגאלן פראנט, די פארשריט וואס סיי די אמעריקאנע רעגירונג און סיי די רעגירונג פון גואטמאלא האבן געטון, און ווי עס האלט לעת עתה.
עס זענען געהערט געווארן שוידערליכע עדות פון אידן וואס האבן דארט קרובים און משפחה, און אויך קינדער און אייניקלעך. מער פון איינמאל האבן די עסקנים און אויך די רבנים זיך געשטיקט און טרערן הערנדיג דעם שוידערליכן מצב וואס קומט פאר דארט.
עקסטער איז געהערט געווארן עדות וואס הגה״צ רבי יחיאל מיכל שטיינמעץ שליט״א, דומ"ץ סקווירא אין בארא פארק האט איבערגעגעבן וואס ער האט גובה עדות געווען פון דארטיגע אידן.
די אסיפה איז די ערשטע אין די רייע פון אויפרידערונג וואס וועט פארקומען אין די קומענדיגע טעג און וואכן.
