בשיבה טובה איז היינט נפטר געווארן הרבני החסיד הישיש ר' יוסף יואל גראסמאן ז"ל, לאנגיעריגער ראש הקהל אין קהילה קדושה ספינקא אין בארא פארק, אין טיפן עלטער פון זיבן און ניינציג יאר.
דער חשובער נפטר האט נאך זוכה געווען לראות בעולמן של ישראל אין דער אלטער היים, זייענדיג פון די לעצטע חסידים אינעם היינטיגן דור וואס האט נאך זוכה געווען להסתופף בצל הקודש פונעם הייליגן חקל יצחק פון ספינקא זי"ע.
צענדליגע יארן איז ער געשטאנען אין שפיץ פון די ספינקא קהילה אין בארא פארק, מיט א זעלטענע געטריישאפט לימין הקודש פון כ"ק אדמו"ר מספינקא שליט"א, דורכאויס די יארן האט ער מנדב געווען מערערע פראיעקטן און בניני הקהילה והמוסדות, אריינגערעכנט א צאל בנינים אין די זוממער קעמפ מחנה שבע רצון ספינקא אין די קעטסקיל בערג.
די לוויה קומט פאר יעצט נאכמיטאג ביי ביהמ"ד הגדול ספינקא אויף די זעקס און פופציגסטע סטריט אין בארא פארק, און ער וועט קומען לקבורה אויפן ספינקא חלקה אין ניו דזשערזי.
