מיט גרויס צער ווערט אויפגענומען די שווערע בשורה איבער די פטירה פון הגאון הגדול רבי יוסף ראזען ז"ל, לאנגיעריגער ריש מתיבתא אין שיכון סקווירא און פון די גרעסטע תלמידי חכמים און מרביצי תורה אין סקווירא שטעטל, וועלכער איז יעצט נאכמיטאג נפטר געווארן אין עלטער פון 81 יאר, נאכן נישט זיין געזונט די לעצטערע יארן.
הגאון ר' אהרן יוסף איז געווען א זון פון הרב החסיד ר' יצחק יחיאל ראזען ע"ה, און א איידעם ביי הרב החסיד ר' משה יעקב שלום אונגאר ע"ה, זייענדיג א שוואגער מיט להבחל"ח הגה"צ רבי אברהם שמואל בנימין סופר שליט"א ראש ישיבת ערלוי. ער איז געווען דער לעצטער מרביץ תורה אין סקווירא שטעטל, וועלכער איז נאך געווארן אויפגענומען אויף די פאזיציע בחייו פון כ"ק אדמו"ר הרה"ק מסקווירא זי"ע, און בברכתו ובעידודו האט ער אויפגעשטעלט תלמידים נאמנים לאלפים דורכאויס די אלע יארן.
ר' יוסל איז געווען א תלמיד חכם עצום, זקן ויושב בישיבה, געזעסן און געהארעוועט יומם ולילה, און איבערגעגאסן פון זיין רייכן תורה קוואל פאר די טייערע תלמידים. נאך וואס די סקווירא ישיבה איז געווארן איינגעטיילט האט ער ווייטער פארגעלערנט שיעורים אין די ישיבה סניף ברכת יעקב, און כסדר פארגעלערנט שיעורים כלליום מיט א מורא'דיגע קלארקייט זיך מעמיק צו זיין בנתיבי התורה והוראה.
זיינע חידושי תורה האט ער געשריבן און מוציא לאור געווען, אין די ספרים איים בים, וואס איז שוין ערשינען אין עטליכע בענדער. זיין קשר צו זיין גרויסן רבי'ן הגאון הגדול רבי יצחק דוב קאפעלמאן זצ"ל ראש ישיבת לוצערן האט זיך שטענדיג דערקענט ביי זיינע שיעורים, זייענדיג דולה ומשקה מתורת רבו לאחרים.
טראץ וואס ער איז נישט געווען אזוי געזונט די לעצטערע יארן, האט ער מיט מסירת נפש געקומען אין ישיבה תמידין כסדרן און ווייטער מרביץ תורה געווען, זייענדיג א מוסטער פון הרבצת התורה ביזן לעצטן אטעם. היינט נאכמיטאג איז ער נפטר געווארן לחיי העולם הבא צום טיפן שאק און טרויער פון כלל חסידי סקווירא, תלמידיו הנאמנים, און זיין לעכטיגע דור ישרים יבורך וואס ער לאזט איבער עלי אדמות.
די לוויה וועט פארקומען היינט נאכמיטאג פיר אזייגער, פארנט פון ביתו נאוה קודש פון כ"ק אדמו"ר מסקווירא שליט"א. דערנאך וועט מען אפרעכטן די טהרה, און שפעטער פארנאכטס וועט פארקומען די לוויה אויפן בית החיים אין שיכון סקווירא.
