בשיבה טובה איז היינט נפטר געווארן הרבנית הצדיקת מרת אטל געשטעטנער ע"ה, אלמנתו ואשת חבר פונעם גאון הגאונים הגה"צ המפורסם רבי נתן געשטעטנער זצ"ל בעל להורות נתן, ראש ישיבת פנים מאירות, וגאב"ד קרית אגודת ישראל, מגדולי הרבנים אין שטאט בני ברק וועלכער איז נפטר געווארן מיט פערצן יאר צוריק.
די חשובע נפטרת ע"ה איז געווען א טאכטער פון הגה"צ ר' מאיר חיים אונגאר זצ"ל רב אין שטאט לאקענבאך אין אונגארן, פון די חתונה פאר א זעכציג יעריגע תקופה איז זי געשטאנען לימין הקודש פון איר גרויסן מאן, וועלכער איז געווען פון די גרעסטע מרביצי תורה בארץ הקודש, און מחבר געווען צענדליגע ספרים בכל מכמני התורה. זי האט געשטיצט און ארויסגעהאלפן איר גרויסן מאן ער זאל קענען אנגיין מיט די עבודת הקודש, און אסאך געטון פאר זיין הרחבת הדעת און מנוחה צו קענען זיצן און לערנען און פסק'נען שאלות פאר אידישע קינדער.
אין עלטער פון דריי און ניינציג יאר איז די רעבעצין היינט נפטר געווארן, איבערלאזנדיג א הערליכע דור בליעה"ר, גאר חשובע קינדער, אייניקלעך, אור אייניקלעך, און אור אור אייניקלעך, דורות נאמנים לה' ולתורתו, ווען איבער אלעם זעהט זיך אן די בנין וחתנין רבנן, אלע אייניג גאר חשובע רבנים ומנהיגי קהילות קדושות, ראשי ישיבות און מורי הוראה.
די זיהן זענען הגה"צ ר' עמרם געשטעטנער שליט"א גאב"ד קרית אגודת ישראל, כ"ק אדמו"ר הגה"צ ר' שלמה געשטעטנער שליט"א מצאנז טשאקאווא, הגה"צ ר' יהודה געשטעטנער שליט"א ראה"כ פנים מאירות, הגה"צ ר' עקיבא, הגה"צ ר' יחיאל מיכל, און הגה"צ ר' אהרן מאיר חיים געשטעטנער שליט"א.
די איידימער זענען הגה"צ ר' אהרן לייב מאלבוצקי שליט"א מלעכאוויטש, הגה"צ המשפיע ר' חיים יוסף בידערמאן שליט"א אב"ד לעלוב ב"ב, הרה"ג ר' יחיאל ווידער שליט"א מרבני וויזניץ, און הרה"ג ר' חיים ווייס שליט"א.
די לוויה קומט פאר היינט 9:00 ביינאכט אין ארץ ישראל, ביים בית המדרש להורות נתן אויף רחוב רב אשי אין קרית אגודת ישראל בני ברק, זי וועט קומען לקבורה אויפן וויזניצע בית החיים אין בני ברק נעבן איר גרויסן מאן, אין די זעלבע צייט וואס עס וועט פארקומען די שמחת החתונה פון א אור אייניקל אין בני ברק.
די רעבעצין ע"ה האט זוכה געווען זיך צו משדך זיין בחייה מיט מערערע אדמורי"ם ורבנים, צווישן זיי האדמורי"ם מקארלין סטאלין, סלונים, תולדות אברהם יצחק, סערט וויזניץ, וויזניץ, לעלוב, קרעטשניף, אלכסנדר, דאראג, דזיקוב וויזניץ, ספינקא, אמשינוב ארה"ב, קרעטשניף קרית גת, קאמארנא, טשערנאוויץ, מעליץ, סטראפקוב, אוזרוב, ראחוב, מישקאלץ, גארליץ, לעלוב ירושלים, ספינקא ירושלים, בערעגסאז, ספינקא מאנסי, און אשלג.
