היינט מאנטאג י"ב אייר איז באשטימט געווארן אין די פאפא קהילה אין מאנסי אלס א יום תענית ותיקון המעשים, נאך די שוידערליכע אינצידענט וואס האט זיך אפגעשפילט אין ביהמ"ד, ווען א ספר תורה איז אראפגעפאלן רח"ל אינמיטן מישן די תורה פון איין פרשה צום אנדערן.
בפקודת הקודש פון כ"ק אדמו"ר מפאפא שליט"א איז באשטימט געווארן אז אלע חברי הקהילה זאלן פאסטן דריי מאל א האלבע טאג, פון די עלות השחר ביז חצות היום, אנגעהויבן פון היינט מאנטאג פרשת בהר, דעם קומענדיגן דאנערשטאג בהר, און די נאכפאלגענדע מאנטאג פרשת בחוקותי, מען וועט פאסטן א האלבע טאג, און די אנדערע האלב אויסלייזן מיט פדיון נפש פון ניין דאללער א טאג, און דער וואס איז נישט בכח צו פאסטן אפילו בלויז א האלבע טאג, זאל אויסלייזן דעם יום התענית מיט אכצן דאללער.
א אויסנאם איז פאר בני הכולל און מרביצי תורה וואס וועלן נאר פאסטן היינט מאנטאג, און די אנדערע טעג אויסלייזן פדיון נפש מיט אכצן דאללער, די בחורים תלמידי הישיבה און די נשים צדקניות זאלן בכלל נישט פאסטן נאר געבן פדיון נפש, און דאס געלט וועט מען נוצן צו פאררעכטן די ארון הקודש.
היינט מאנטאג וועט מען זאגן סליחות ביים דאווענען כדין תענית ציבור, זייענדיג אויך תענית שני בתרא פון תענית בה"ב העולמי, און היינט פארנאכטס וועלן אלע חברי הקהילה זיך צוזאמנעמען און אויסזאגן גאנץ ספר תהלים לתשובה ותיקון המעשים.
אזוי אויך האט הגה"צ אבד"ק פאפא מאנסי שליט"א איבערגעגעבן די הוראת הקודש פון אביו הגדול כ"ק אדמו"ר מפאפא שליט"א, זיך צו מחזק זיין אין עטליכע ענינים הצריכים חיזוק, גענצליך אויסלעשן די סעלפאון ביים דאווענען, נישט רעדן ביים דאווענען סיי אין די וואכן און סיי אין שבת, בשעת מען מאכט הגבה אויפן ספר תורה זאל שטיין א אחראי דערנעבן זיכער מאכן אז מען מאכט הגבה פארזיכטיג און בכבוד הראוי, און ווען מען מישט די ספר תורה פון איין פרשה צום אנדערן, זאל עס נאר זיין דורך צוויי עלטערע מענטשן מיט א מורא'דיגע זהירות.
