ליידער קומט אריין שווערע באריכטן פון פאמאונע, אז די ספרי תורה אין ביהמ"ד חסידים ליובאוויטש וואס איז היינט פארטאגס פארברענט געווארן אין העלישע פלאמען, האבן געליטן גאר שווערע פייער און וואסער שאדן ה"י.
ווי באריכטעט איז די גאנצע שוהל געביידע אין פאמאונע הייטס ארויף אין העלישע פלאמען, און טראץ די שווערע ארבעט פון די פייערלעשער האט גענומען גאר לאנג ביז די פייער איז געברענגט געווארן אונטער קאנטראל, אין די צייט וואס פילע ספרי קודש און עטליכע פאר תפילין, זענען ליידער אוועק אינעם רויעך.
טראץ וואס מען האט נישט געקענט ארויסראטעווען די ספרי תורה צוליב די שעדליכע פלאמען, האט מען אבער געהאפט אז עס האט גארנישט שלעכט פאסירט, נאך וואס די ספרי תורה זענען געווען אין א באשיצטע סעיף, וואס קען אפיציעל אויסשטיין פייער און וואסער. אבער ליידער איז אין די לעצטערע שעה'ן אנטפלעקט געווארן א שרעקליכע בילד, ווען מ'האט אויפגעבראכן די סעיף, און געטראפן די ספרי תורה ליידער פארברענט רח"ל, מיט גאר שווערע שאדן ה"י.
