חסידי וויזניץ זענען איינגעהילט אין פרייד ווען עס ווערט אוועקגעשטעלט א נייע וויזניצע קהילה אין לינדען ניו דזשערזי, תחת דגלו והדרכתו פון כ"ק אדמו"ר מוויזניץ שליט"א פון בארא פארק, נאך וואס אין די לעצטע פאר יאר האבן זיך אהינגעצויגן א שיינע ציבור חסידים, וואס האלט שוין היינט ביי צענדליגע משפחות בליעה"ר.
בברכתו ובעידודו פון כ"ק אדמו"ר מוויזניץ שליט"א פון בארא פארק האט מען זיך אין די טעג צוזאמגענומען אוועקצושטעלן דעם שיינעם קהילה נאה וחסידה וואס וועט דינען אלס תל תלפיות פאר חסידי וויזניץ תושבי העיר, און צו דעם צוועק איז מען אריין אין קאנטראקט אפצוקויפן א שיינעם בנין רחבת ידים אין צענטער פון שטאט וואס וועט פארוואנדלט ווערן אלס אכסניא של תורה ותפילה פאר די וויזניצע קהילה.
פארגאנגענע וואך איז דער וויזניצער רבי שליט"א אנגעקומען צוגאסט אין שטאט לינדען, וואו עס איז פארגעקומען א רייע אסיפות מיט די עסקני הקהילה, דערביי האבן די עסקנים צוגעוויזן פארן רבי'ן די נייע בנין וואס ווערט אפגעקויפט אין די טעג, און דער רבי שליט"א האט ווארעם געוואונטשן די עסקנים צו פאראויסגיין מיט דעם פראיעקט צו מרחיב זיין די גבולי הקדושה אויף א שטארקן פארנעם.
