די הונדערטער איינוואוינער אין קרית צאנז טבריה לעבן מיט די טעג פריידיגע מאמענטן פון הרחבת גבולי הקדושה, ווען אויף דריי באזונדערע פלעצער ווערט פארברייטערט די קהילה נאה, א נייער בית המדרש אינעם שטעטל, א נייער ישיבה קטנה, און א מאסיווע בוי פראיעקט פארן מיידל שולע אינערהאלב די מוסדות הקדושים.
פארגאנגענעם שבת קודש פרשת קרח האט זיך אין א מזל'דיגע שעה געעפנט די נייע בית המדרש, אין צוגאב צום גרויסן ביהמ"ד אין קרית צאנז טבריה, די נייע שטיבל וואס איז געעפנט געווארן צוליב די וואוקס פונעם ציבור, איז איינקוואטירט אינעם בנין התלמוד תורה, וואס איז געווארן אויסגערישט מיט די בעסטע מעגליכקייטן לרווחת ציבור המתפללים.
אלס ר"ם אין ביהמ"ד האט כ"ק אדמו"ר מצאנז שליט"א ממנה געווען הרה"ג ר' יוסף מאיר ייגר שליט"א, און באזונדער האט דער רבי אויפגענומען א וועד פון פינף חשובע אינגעלייט צו שטיין אין שפיץ פונעם ביהמ"ד, אונטער די הדרכה פונעם מרא דאתרא הגה"צ אבד"ק קרית צאנז טבריה שליט"א בנו חביבו פונעם רבי'ן שליט"א.
ביים ערשטן שבת האט הרה"ג ר' יוסף מאיר ייגר שליט"א אויפגעטרעטן מיט א דרשה בעפאר קבלת שבת, און שבת אינדערפרי איז פארגעקומען א ברייטע קידושא רבא לכבוד די חנוכת הבית, וואו עס האבן זיך באטייליגט די הונדערטער תושבי הקריה.
באזונדער איז אין די טעג געווארן אויפגענומען די בשורה טובה אז צום קומענדיגן שנת הלימודים חודש אלול הבעל"ט, וועט געעפנט ווערן די נייע ישיבה לצעירים אין קרית צאנז טבריה, אין שפיץ פונעם רב שליט"א, אלס מנהל רוחני איז געווארן אויפגענומען הרה"ג ר' יצחק אייזיק פרענקל שליט"א ראש ישיבת באר מים חיים אין עיה"ק צפת.
ווידער ווערט אפגעצייכנט הרחבת גבולי הקדושה, ווען אין די יעצטיגע טעג האט מען אנגעהויבן די פאקטישע בוי ארבעט אויפצובויען א גיגאנטישע געביידע פאר די מיידל שולע "בנות צאנז" אין קרית צאנז טבריה, וועלכע ציילט שוין היינט ארום פינף הונדערט תלמידות בליעה"ר. דאס קומט נאך לענגערע ארבעט פון די עסקני המוסדות צו ערהאלטן די נויטיגע פערמיטן.
