אין הארץ פון די שטאט בארא פארק, איז אין די יעצטיגע טעג אוועקגענומען געווארן א היסטארישע געביידע פון תורה ותפילה, די בנין פון ת"ת בני ציון ד'באבוב אויף די זיבן און פערציגסטע סטריט ביי די זעכצנטע עוועניו, וואס איז מיט יארן צוריק געווען די אכסניא של תורה פון ישיבת נאוואמינסק אין בארא פארק.
די בנין וואס האט געהאט א היסטאריע פון נאנט צו הונדערט יאר, איז אין די יעצטיגע טעג געווארן איינגעווארפן, נאך וואס די באבובער חדר איז שוין פולקאם איינקוואטירט אין די נייע תלמוד תורה געביידע אויף די זעקס און דרייסיגסטע סטריט, לאזנדיג פריי דעם אלטן בנין פאר פרישע פראיעקטן אינערהאלב קהילת ומוסדות באבוב.
לויטן פלאן וועט די באבובער קהילה און מוסדות אויפבויען דארט א גרויסע הערליכע בנין וואס וועט סערווירן פארשידענע וויכטיגע אקטיוויטעטן אינערהאלב די קהילה און מוסדות, צום ערשט וועט דארט געבויעט ווערן עטליכע קלענערע שמחה זאלן, וואו מען וועט קענען פראווענען די קלענערע שמחות פאר א ביליגע פרייז, מיט די חתונה פלאן פון "חיים של שלום". אזוי אויך וועט מען דארט אהערשטעלן מערערע אפיסעס פאר די מערערע חסד ארגענעזאציעס אינערהאלב ק"ק באבוב, א באזונדערע אפטיילונג פאר הכנסת אורחים פאר די פילע געסט וואס קומען זיך מסתופף זיין בצל הקודש, און נאך פארשידענע איינריכטונגען וואס וועט שטארק ארויסהעלפן די הנהלת הקהילה והמוסדות.
