אין די יעצטיגע טעג איז געמאלדן געווארן גאר היסטארישע נייעס פון הרחבת גבולי הקדושה, ביי חסידי חב"ד אלוועלטליך און די אידישע געמיינדע אין קראון הייטס בפרט, ווען די באקאנטע ישיבה אהלי תורה פון חסידי חב"ד קויפט אפ א פרישע גיגאנטישע געביידע אין שטאט, צו פארברייטערן די גבולי הקדושה מיט פרישע מעגליכקייטן און נייע בתי מדרשים צו קענען מחנך זיין די קומענדיגע דורות מיט הרחבת הדעת.
די באקאנטע ישיבה אהלי תורה איז סטאנציאנירט אצינד אין א גרויסן קאמפלעקס ביים ווינקל פון איסטערן פארקוועי און ברוקלין עוועניו, וואו עס ווערן נתחנך הונדערטער בחורים עלטער פון די מתיבתא יארן, ביז צו זייער גליקליכן טאג ווען זיי זענען זוכה אריינצוקומען בברית הנישואין, דא אין דעם ישיבה אהלי תורה טוען די בחורים שטייגן אין א ווארעמע ישיבה'דיגע אטמאספערע, זיך גרייטענדיג ארויסצוגיין צו די וועלט צו קענען משפיע זיין אויף אנדערע, דינען אלס שלוחים און מחנכים און ווייטער פארשפרייטן דעם לעכטיגן אור.
די עקזיסטירנדע ישיבה קאמפלעקס איז שוין לאנג אויסגעוואקסן איר געברויך, מיט יעדע ווינקל וואס איז פארנומען פאר אנדערע אפטיילונגען אין ישיבה, וואו די בחורים זיצן און לערנען און פארברענגען אין א ווארעמע אטמאספערע, אין שאטן פון די חשובע מרביצי תורה און אינגעלייט, משפיעים און מחנכים וואס ברענגען אריין דעם חסידישן גייסט און די עבודת הקודש וואס ליגט אויף יעדן איד באזונדער.
אין דעם ישיבה אהלי תורה איז פארהאן א ריזן צאל בחורים וואס קומען פון איבער די גאנצע וועלט, זעקס און פערציג לענדער און איבער צוויי הונדערט שטעט אלוועלטלעך, ווען אלע שטראמען קיין קראון הייטס צום חב"ד הויפטקוואטיר, צו ווערן נתחנך אין אט דעם הייליג פלאץ.
אצינד איז די הרחבת גבולי הקדושה אריין אין קראפט, ווען די הנהלת הישיבה קויפט אפ א גיגאנטישע געביידע ביים ווינקל פון איסטערן פארקוועי און בעדפארד עוועניו, א פיר שטאקעדיגע געביידע פון אכט און פופציג טויזענט סקווער פיס, וואס קען פארברייטערט ווערן מיט נאך העכערע שטאקן און גרייכן אכציג טויזענט סקווער פיס.
אין די נייע געביידע וועט ווערן אהערגעשטעלט דריי גרויסע בתי מדרשים צום לערנען, צענדליגע שיעור צימערן און פריוואטע צימערן פאר די משפיעים אין ישיבה, עס איז ערווארטעט צוצוברענגען גרויס הרחבת הדעת פאר די תלמידים, און נאך פלאץ פאר פרישע הונדערטער תלמידים וואס ווארטן אריינצוקומען בין כותלי הישיבה.
