אלפי חסידי וויזניץ נעמען אויף די טעג מיט גרויס איבערראשונג, אז קומענדיגן ערב ראש חודש אלול וועט פארקומען א גרויסארטיגער מעמד אין אתרא קדישא מירון, אין שפיץ פונעם רועה נאמן כ"ק אדמו"ר מוויזניץ שליט"א לרפו"ש, וועלכער וועט מופיע זיין בהדרו אויף א גרויסע תפילת רבים, און מעמד פתיחת המגבית צו שאפן שווערע מיליאנען פאר די וויזניצע מוסדות קאסע "איגוד מוסדות וויזניץ".
אין די יעצטיגע טעג ווערן געמאכט די צוגרייטונגען צו לאזן אין גאנג א גרויסער מגבית לטובת איגוד מוסדות וויזניץ, וואס טראגט דעם פינאנאציעלן לאסט פון די וויזניצע מוסדות לענגאויס ארץ ישראל, און די שווערער עול ליגט אויפן פלייצעס פונעם רבי'ן שליט"א, טראץ וואס דער רבי שליט"א איז ליידער נישט אין א גוטן געזונט צושטאנד ה"י.
לויט די פלענער וועט פארקומען א גרויסער מעמד אין אתרא קדישא מירון קומענדיגן דינסטאג פרשת שופטים, אור ליום ערב ראש חודש אלול, ווען דער רבי שליט"א וועט אנקומען מתפלל זיין ביים ציון הרשב"י אין באגלייטונג פון טויזענטער חסידים, א מעמד תפילה וואס וועט פאראייניגן טויזענטער חסידים אין הייסע תחינות ובקשות אין ליכט פון די שווערע מצב וואס הערשט אויף אחינו בני ישראל בארץ הקודש.
דארט אויפן פלאץ וועט פארקומען די מעמד פתיחת המגבית צו אויפטרייבן מיליאנען דאללארן לטובת איגוד מוסדות וויזניץ, ווען אין די יעצטיגע טעג האבן זיך הונדערטער עסקנים שוין ארויפגעשארט די ארבל ארויסצוהעלפן דעם רבי'ן טראגן דעם שווערן עול, און זיכער מאכן אז עס ווערט געשאפן די נויטיגע סכומים צו קענען ממשיך זיין מיט די הרבצת תורה וחסידות אין אלע אפטיילונגען פון די מוסדות הקדושים.
