בחצר הקודש תולדות אהרן איז אין די לעצטערע טעג פארגעקומען א אייגענארטיגע פראיעקט, ווען אלע חסידים האבן געקענט אריינגעבן זייער חוות דעת אנבאלאנגט די בוי ארבעט אהערצושטעלן א נייע גרויסע ביהמ"ד פאר חסידי תולדות אהרן אין ירושלים עיר הקודש.
די פלענער אויפצובויען א נייע ביהמ"ד איז שוין געלאזט געווארן אין גאנג מיט עטליכע יאר צוריק, מיט צוויי יאר צוריק איז פארגעקומען א גרויסע מעמד "המייסדים" וואו די חסידים האבן זיך אונטערגענומען גרויסע סכומים צו פינאנצירן דעם פראיעקט, נאך וואס די יעצטיגע ביהמ"ד איז שוין לאנג צר מהכיל, און קען נישט צושטעלן די נויטיגע הרחבת הדעת ביי די תפילות און טישן בצל הקודש פון כ"ק אדמו"ר מתולדות אהרן שליט"א.
אין לויף פון די לעצטע צוויי יאר האט די בוי פראיעקט זיך אנגעקלאפט אין פארשידענע שוועריגקייטן, ווען די געטרייע וועד קרן הבנין האט באטראכט אלע אפציעס צו מען זאל פאראויסגיין און פאקטיש אראפווארפן דעם עקזיסטירנדן ביהמ"ד, וואס באדייט אז קיין וועג צוריק איז שוין נישט פארהאן.
דעריבער האט מען אצינד דורכגעפירט א ספעציעלן פראיעקט, וואו מען האט אויסגעפרעגט אלע חסידים וואס זייער מיינונג איז איבער די ווייטערדיגע פלענער פון די בוי ארבעט, נאכן אויספרעגן יעדן איינעם און אפציילן די שטימעס אונטערן אויפזיכט פון די רבני ודייני הקהילה, איז די בילד קלאר געווארן אז דריי און אכציג פראצענט פון די חסידים ווילן אז מען זאל פאראויסגיין מיט דעם פראיעקט, טראץ וואס עס וועט אריינשלעפן אין אסטראנאמישע הוצאות, וויבאלד א נייע ביהמ"ד איז גאר וויכטיג פארן ציבור.
נאכן איבערגעבן די תוצאות פאר כ"ק אדמו"ר מתולדות אהרן שליט"א האט דער רבי שליט"א ווארעם געוואונטשן די עסקנים צו ממשיך זיין מיט די עבודת הקודש, און בעז"ה באלד נאך די ימים טובים הבעל"ט וועט די פאקטישע בוי ארבעט אריינגיין אין קראפט, מיטן האפענונג אז די נייע ביהמ"ד זאל זיין גרייט וואס שנעלער לרווחת הציבור.
