אין די יעצטיגע טעג איז געמאלדן געווארן די נייעס איבער די גרינדונג פון א נייע ישיבה קטנה אין די ישיבה נעץ אין קרית יואל, די ניינטע ישיבה קטנה אין צאל, וואס וועט טראגן דעם נאמען "ישיבת חתם סופר", לשמו ולזכרו פונעם בארימטן גאון וצדיק תופס ישיבה הגה"ק מרנא ורבנא בעל החתם סופר זי"ע.
ווי באקאנט האט די הנהלת המוסדות צוטיילט די ישיבות מיט עטליכע יאר צוריק, עס זאל זיין איינגעטיילט אין באזונדערע סניפים, צו קענען מחנך זיין די יונגע בחורים מיט געטריישאפט און איבערגעגעבנקייט, ווען אלס ווערט געפירט תחת דגלו והדרכתו פונעם נשיא המוסדות כ"ק אדמו"ר מסאטמאר שליט"א.
דאס יאר האט מען ווידער געזעהן די געברויך צו מרחיב זיין די גבולי הקדושה, מיט די נאכאנאנדע בליה און וואוקס פון די צאל תלמידי הישיבה, און צום קומענדיגן זמן הלימודים וועט בעז"ה געעפנט ווערן א נייע ישיבה קטנה, די ניינטע אין צאל, וואס כ"ק אדמו"ר מסאטמאר שליט"א האט קורא שם געווען "ישיבה חתם סופר", לזכרו פונעם הייליגן חתם סופר זי"ע.
אלס מנהל הישיבה איז געווארן אויפגענומען הרה"ג ר' יהושע כהנא שליט"א לאנגיעריגער מגיד שיעור בין כותלי הישיבות, פארגאנגענע וואך איז די נייע הנהלה געפארן קיין ניו העמפשער צו מקבל זיין ברכת הקודש פון כ"ק אדמו"ר מסאטמאר שליט"א, וועלכער האט איבערגעגעבן ווארעמע דברי חיזוק והדרכה פאר די מרביצי תורה.
