אידישע קינדער בכל מקומות מושבותיהם ווערן געבעטן צו מתפלל זיין און מעורר זיין רחמי שמים לרפואת כ"ק אדמו"ר מבית שמואל צבי ספינקא שליט"א, וועלכער געפונט זיך ליידער על ערש דוי אין א קריטישן מצב, און איז אנגעוויזן אויף רחמי שמים מרובים.
דער רבי שליט"א מוטשעט זיך שוין ליידער איבער א יאר מיט די ביטערע מחלה ה"י, און טראץ וואס מען האט ארויסגעקוקט אויף בעסערע רעזולטאטן האט זיך די מצב ליידער שטארק פארערגערט מיט פרישע קאמפליקאציעס ה"י, אין די לעצטע צוויי וואכן איז ליידער אנטשטאנען א דראסטישע פארערגערונג ה"י, און דעם פרייטאג נאכמיטאג בפניא דמעלי שבתא האט מען אפגעפירט דעם רבי'ן אין איילעניש צו די מאונט סיני שפיטאל אין מאנהעטן, וואו דער רבי געפונט זיך ליידער פארשלאפט אין א גאר קריטישן מצב, און די דאקטוירים זאגן אז מען דארף גרויס רחמי שמים זיך צו קענען ארויסזעהן פון דעם צושטאנד.
אידישע קינדער זענען מרבה בתפילה פאר כ"ק מרן יוסף מאיר בן בלומא שרה לרפואה שלימה, דער רבי זאל זיך ערהוילן און זיך ארויסדרייען פון דעם שווערן מצב, בפרט ווען מ'שטייט שוין סמוך ונראה צום יומא דהילולא קדישא פון זיין גרויסן זיידן אוהבן ולבן של ישראל כ"ק מרן אדמו"ר הרה"ק מספינקא זצ"ל, וואס געפאלט היינט אויפדערנאכט ז"ך אב, זיין גרויסן זכות זאל מגין זיין אויף דעם רבי'ן שליט"א ממשיך דרכו בקודש, דער רבי זאל נאך לאנגע יארן קענען משפיע זיין פאר עדת צאן מרעיתו וכל בית ישראל, והן קל כביר לא ימאס תפילת הרבים.
