היינט ז"ך אב געפאלט די יומא דהילולא קדישא פון כ"ק אדמו"ר הרה"ק מטאהש זי"ע, פילע אידן קומען אן קיין קרית טאהש קאנאדע צו פוקד זיין דעם ציון הק' בעצם יומא דהילולא קדישא, בנו ממלא מקומו כ"ק אדמו"ר מטאהש שליט"א וועט ארויפגיין צום ציון הק' נאך תפילת שחרית בראש קהל חסידיו, און אויסזאגן גאנץ ספר תהלים כנהוג.
היינט ז"ך אב געפאלט די יומא דהילולא קדישא פון כ"ק אדמו"ר הרה"ק מספינקא זי"ע, פילע אידן גייען ארויף צום ציון הק' אין ניו דזשערזי להיפקד בדבר ישועה ורחמים.
בנו כ"ק אדמו"ר מבית יצחק ספינקא שליט"א וועט ארויפגיין צום ציון הק' אין די מיטאג שעה'ן, און שפעטער פארנאכטס אפרעכטן די יארצייט טיש בהיכל ביהמ"ד הגדול בית יצחק ספינקא אויף קיעפ סטריט אין וויליאמסבורג.
בנו כ"ק אדמו"ר מתולדות צבי ספינקא שליט"א וועט ארויפגיין צום ציון הק' אין ניו דזשערזי זעקס אזייגער נאכמיטאג, און דערביי אויפטרעטן מיט דברי כיבושין והתעוררות, נאכן מעמד עלי' לציון וועט דער רבי שליט"א אפרעכטן די יארצייט טיש אין א גרויסע זאל אין ניו בראנסוויק ניו דזשערזי, נישט ווייט פונעם ציון הק' אויפן וואשינגטאן סעמעטערי.
בנו כ"ק אדמו"ר מקראלי שליט"א וועט פוקד זיין דעם ציון הק' בראש קהל חסידיו עלף דרייסיג פארמיטאג, און שפעטער פארנאכטס אפרעכטן די יארצייט טיש אין קראלי ביהמ"ד אין וויליאמסבורג.
היינט ז"ך אב געפאלט די יומא דהילולא קדישא פון הגה"צ אבד"ק טערצאל זצ"ל, חתנו כ"ק אדמו"ר מקאשוי שליט"א וועט אפרעכטן א מסיבת לחיים היינט צופרי נאך שחרית בהיכל הישיבה אין מחנה ברכת שמים קאשוי אין אלסטערהייטס, נאכמיטאג וועלן די קינדער הרבנים שליט"א און די איידימער כ"ק אדמו"ר מקאשוי שליט"א און הגה"צ אבד"ק פאיע שליט"א, אנקומען צום ציון הק' אין לאנג איילענד, און דערנאך וועט פארקומען די סעודת הילולא אין מאנסי אין ביהמ"ד התאחדות אברכים ברכת שמים קאשוי אויף סוזען דרייוו.
כ"ק אדמו"ר מקאסוב שליט"א וועלכער איז צוגאסט אין ארץ ישראל דורכאויס די זוממער וואכן, וועט היינט אנקומען אויף א מעמד תפילה והתעוררות אויפן ארט וואו עס איז געשטאנען משכן שילה, אינאיינעם מיט פילע אידן חסידים ואנשי מעשה.
היינט קומט פאר די סיום מחצית מסכת פסחים וואס איז געלערנט געווארן אין ראם פון עמוד היומי דחסידי נדבורנא ביתר, אין ביהמ"ד נדבורנא אויף רחוב הרב צדקא אין ביתר, אין שפיץ פון כ"ק אדמו"ר מנדבורנא ביתר שליט"א.
כ"ק אדמו"ר מאלכסנדר שליט"א וועלכער האט זיך אויפגעהאלטן די לעצטע פאר וואכן אין סט. מוריץ שווייץ אויף אפרוה, קערט זיך היינט צוריק למעון קדשו אין בני ברק.
אריינצושיקן מודעות און נייעס, שיקט אן אימעיל צו NEWS@JDNMAIL.COM
