א שרעקליכע טראגעדיע האט באטראפן היינט קהילה קדושה צאנז קלויזענבורג וכל בית ישראל, מיט די פלוצלינגדיגע פטירה פון האי גאון וחסיד מורה ודאין, הרה"ג ר' צבי זאב בערגער זצ"ל, דיין און מורה צדק אין ק"ק צאנז קלויזענבורג אין בארא פארק, וועלכער איז ליידער נישט אויפגעשטאנען היינט צופרי, זייענדיג אין בליענדן עלטער פון דריי און פערציג יאר.
די ביטערע פארלוסט איז א אומבאשרייבליכע קלאפ פאר די גאנצע קהילה און פאר גאנץ כלל ישראל, אידישע קינדער איבער די גאנצע וועלט האבן נהנה געווען מאור תורתו וחכמתו, די לעכטיגע שיעורים און הוראות וואס איז פארשפרייט געווארן אומעטום, זיין כח התורה וואס איז געווען באקאנט, און איז לעצטנס נאכמער באקאנט געווארן דורך שומעי לקחו תלמידיו ומעריציו, וואס האבן ארויסגעקוקט אויף דעם שטארקן אור התורה בימינו אלה.
דער דיין הרה"ג ר' צבי זאב בערגער זצ"ל איז געווען א חשובער אינגערמאן מלא וגדוש בתורה וחסידות, געזעסן און געהארעוועט שעות ארוכות און געווען א מוסטער פאר אנדערע אידן, ער האט זיך משלים געווען בתורה והוראה און געדינט אלס מורה צדק אין ק"ק צאנז קלויזענבורג, וואו אלע צוגלייך האבן אים געשעצט און מוקיר געווען כבוד תורתו, זיך שואל עצה געווען בדעת תורתו הברורה און גענאסן פון א זעלטענע קלארקייט אין תשובות בהלכה והוראה.
דער דיין פלעגט פארלערנען שיעורים סיי אין די קהילה און סיי פאר גאנץ כלל ישראל, צו אין ראם פון אירגון שיעורי תורה צו דורך אנדערע פראגראמען, אזוי אויך האט ער אהערגעשטעלט ספעציעלע פראגראמען פאר אנדערע אידן צו קענען לערנען הלכה למעשה אויף א גרינגע פארנעם, מיט וואונדערליכע ידיעות בכל חדרי התורה.
אויסער זיין ראלע אלס מורה צדק אין ק"ק צאנז קלויזענבורג, איז דער דיין געזעסן אין בית הוראה דק"ק קארלסבורג און גע'פסק'נט שאלות פאר אידישע קינדער, מורה געווען דעם דבר ה' ביד רמה.
ליידער איז אבער אנגעקומען היינט די ביטערע ידיעה, אז שקעה חמה שלא בעונתה, הוא הלך למנוחות ואותנו עזב לאנחות, זייענדיג אויף אפרוה אין שווייץ איז ער ליידער נישט אויפגעשטאנען רח"ל, און טראץ די פרואוון פון חברה הצלה איז ליידער באשטעטיגט געווארן אז שבק חיים לכל חיי, ועלתה נשמתו בטהרה אין בליענדן עלטער פון דריי און פערציג יאר.
דער דיין זצ"ל לאזט איבער א דור ישרים יבורך, א שטוב מיט קינדערלעך אינדערהיים זרע ברך ה', און הונדערטער ידידים ומעריצים פון נאנט און ווייט וואס קענען זיך שווער טרייסטן נאך אזא ביטערע פארלוסט.
יהא זכרו ברוך.
