אלפי חסידי גור זענען איינגעהילט אין שאק און טרויער, מיטן ערהאלטן די ביטערע בשורה פון ביהמ"ד הגדול דחסידי גור אין ירושלים, אז דער לעגענדארער בעל קורא אין ביהמ"ד הגדול און באקאנטער מרביץ תורה, הרה"ג ר' יהודה ארי' טאוב ז"ל, איז פלוצלינג נפטר געווארן היינט נאכמיטאג, נאכן צוזאמפאלן אינמיטן פארלערנען א שיעור אין ביהמ"ד הגדול.
הרה"ג ר' יודל טאוב ז"ל זעקס און זיבעציג יאר אלט, איז געווען פון די חשובע תלמידי חכמים צווישן חסידי גור, א חשובער מרביץ תורה וועלכער האט צענדליגע יארן פארגעלערנט א שיעור דף היומי אין ביהמ"ד הגדול גור אין ירושלים, און האט מחבר געווען ספרים "אוצר ההלכות". אזוי אויך איז ער געווען פון די הויפט גבאים פון קופת רבי מאיר בעל הנס כולל פולין, זייענדיג עוסק למען עניי ארץ ישראל.
ער איז געווען אן איידעם ביי הרב החסיד ר' חיים משה קנאפף ז"ל וועלכער פלעגט דינען אלס בעל קורא אין ביהמ"ד הגדול גור, און נאך זיין פטירה האט ער איבערגענומען דעם תפקיד און פאר די לעצטע צוואנציג יאר איז ר' יודל געווען דער קביעות'דיגער בעל קורא אין ביהמ"ד הגדול יעדן שבת און יום טוב.
זייענדיג אין גרויסן ביהמ"ד היינט נאכמיטאג ביים פארלערנען זיין טעגליכן שיעור, איז ר' יודל פלוצלינג אוועקגעפאלן רח"ל, און טראץ די פרואוון פון די הצלה לייט אים צו ראטעווען איז ער ליידער נפטר געווארן אויפן פלאץ, איבערלאזנדיג א שיינעם דור, קינדער און אייניקלעך זרע ברך ה', און טויזענטער גערער חסידים וואס זענען שאקירט פון די פלוצימ'ע געשעעניש.
