א ביטערע טראגעדיע האט פאסירט היינט אין מאנסי, ווען א קליין אידיש מיידל איז ל"ע געווארן אראפגעקלאפט דורך א באס אויף בלאוועלט ראוד, און ליידער איז דאס קינד נפטר געווארן אויפן פלאץ ה"י.
די עקסידענט האט פאסירט נאך ניין אזייגער צופרי, אויף די פארנומענע בלאוועלט גאס נעבן מענאר דרייוו, ווען די באסעס פון מוסדות התורה זענען אדורכגעפארן ווי יעדן טאג אפצונעמען די יונגע קינדערלעך צו גיין אין חדר און מיידל שולע. ליידער האט אבער דאן פאסירט דאס שרעקליכסטע ווען א זיבן יעריג מיידל איז ל"ע געווארן אראפגעקלאפט דורך א באס אויף א שווערע פארנעם.
חברה הצלה און עמערדזשענסי אגענטורן זענען אנגעקומען אויפן סצענע און גלייך באשטעטיגט דאס ארגסטע רח"ל, די גאס ארום איז געווארן אפגעשפארט פאר אויספארשונגען, צוברענגענדיג א שרעקליכע טרויער און שאק ביי אלע איינוואוינער ארום, נאנטע און באקאנטע און גאנץ כלל ישראל.
דאס מיידל הילדה בלומא ברכה וועבער ע"ה זיבן יאר אלט, איז א טאכטער פון להבחל"ח האברך החשוב ר' ישראל אפרים וועבער הי"ו מחשובי חסידי וויזניץ, און פון די נאנטע מקורבים ונאמן ביתו פון כ"ק אדמו"ר מזידטשויב פרעמיסלא שליט"א, אן אייניקל פון הרה"ג ר' משה מאנדל שליט"א אב"ד בית מרדכי אין פלעטבוש, און א אייניקל פון הרב החסיד ר' אייזיק לייב מיללער הי"ו גבאי ביהמ"ד הגדול וויזניץ אין מאנסי.
די לוויה וועט פארקומען היינט מיטוואך 3:30 נאכמיטאג פארנט פון ביהמ"ד הגדול וויזניץ אין מאנסי, דערנאך ארום 4:00 פארנט פון ביהמ"ד זידטשויב פרעמיסלא אויף אמת לעין, אויפן וועג צום וויזניצע בית החיים אין מאנסי וואו זי וועט קומען לקבורה.
ויה"ר שלא ישמע עוד שוד ושבר בגבולינו, ונשמע ונתבשר בשורות טובות.
