א שוידערליכע טראגעדיע האט פאסירט היינט אין שטאט מודיעין עילית אין ארץ ישראל, ווען א זיבן יעריג קינד איז ל"ע געווארן אראפגעקלאפט דורך א באס זייענדיג אויפן וועג אהיים פון חדר, און ליידער איז ער נפטר געווארן אויפן פלאץ פון די גאר שווערע וואונדן ה"י.
הילד משה גאלינסקי ע"ה, איז געווען פון די חשובע תלמידים אין ת"ת ברסלב אין מודיעין עילית, זיין פאטער להבחל"ח הרב החסיד ר' אהרן גאלינסקי הי"ו מחשובי חסידי ברסלב ומלומדי כולל חצות אין די ברסלבער קלויז אין מודיעין עילית, איז אן אייניקל פונעם באקאנטן משפיע און מגיד מישרים הגה"צ רבי יענקעלע גאלינסקי זצ"ל, און אן אייניקל פונעם באקאנטן ברסלבער חסיד און משפיע הגה"צ ר' שמואל שפירא זצ"ל.
זייענדיג אויפן וועג אהיים פון חדר היינט שבעה עשר בתמוז ארום צוועלף אזייגער מיטאג, איז דאס קינד משה ע"ה אריבער די גאס אינאיינעם מיט זיינע חברים, ביי א ווינקל אויף רחוב רבי עקיבא, אבער ליידער איז ער געווארן אראפגעקלאפט דורך א באס און ער איז קריטיש פארוואונדעט געווארן אויפן פלאץ. עמערדזשענסי לייט האבן באלד באשטעטיגט אז ער איז שוין נישט בין החיים רח"ל, און זק"א וואלאונטירן זענען געווארן אראפגערופן צו פארזיכערן כבוד המת און ארויסהעלפן אויפן סצענע.
די לוויה איז פארגעקומען פיר אזייגער נאכמיטאג ביים ברסלבער קלויז אין בראכפעלד, מודיעין עילית, און דערנאך איז ער געקומען לקבורה אויפן הר הזיתים.
