אן אומבאשרייבליכע צער און טרויער לאזט זיך אראפ אצינד אויף די חסידישע וועלט, מיטן אנקום פון די ביטערע בשורה איבער די הסתלקות לשמי מרום פון כ"ק אדמו"ר מבית שמואל צבי ספינקא זכר צדיק לברכה, כ"ק אדמו"ר הרה"צ רבי יוסף מאיר הורוויץ זצ"ל וועלכער איז אין די מינוטן נסתלק געווארן לגנזי מרומים, אין בליענדן עלטער פון אכט און פופציג יאר.
שקעה חמה שלא בעונתה איז די ריכטיגע אויסדרוק אויף די שווערע פארלוסט, ווען מ'באוויינט די פריצייטיגע פטירה פונעם ספינקא רבי'ן זצ"ל וועלכער האט משפיע געווען תורה וחסידות פאר אידישע קינדער, א געהויבענער פערזענליכקייט וואס האט אנגעווארעמט אידישע קינדער לאביהם שבשמים, ממשיך געווען דעם שיינעם שלשלת הקודש פון אבותיו הקדושים לבית ספינקא, און ליידער איז ער אזוי יונג אוועקגעריסן געווארן בשיא פריחתו.
דער ספינקא רבי זכר צדיק לברכה איז געווען דער עלטסטער זון פון כ"ק אדמו"ר רבי ישכר דוב בעריש מספינקא זצ"ל בעל דובר מישרים, און נכדו חביבו פונעם ספינקא רבי'ן הרה"ק רבי הערשעלע זצ"ל ביי וועם ער האט גענאסן א חיבה יתירה, אויפן שויס פונעם גרויסן זיידן איז ער אויפגעוואקסן אין זיינע יונגע יארן און געלערנט ביי אים תורה וחסידות, זיך געווארעמט לאורו הבהיר און אריינגענומען פילע אוצרות וואס דער גרויסער זיידע האט משפיע געווען אויף אים.
שבעה עשר בתמוז תשכ"ח איז דער רבי זצ"ל געבוירן געווארן אין וויליאמסבורג, אלס עלטסטע זון צו זיין טאטן דער ספינקא רבי הרה"ק רבי בעריש זצ"ל, און צו זיין מאמע הרבנית בלומא שרה ע"ה וועלכע איז ליידער טראגיש אומגעקומען אין א שרעקליכע עקסידענט רח"ל מיט צוואנציג יאר צוריק, א טאכטער פון הגה"צ רבי אלעזר מייזליש זצ"ל אבד"ק אוהעל.
מיט א הערליכע יחוס צו די פריערדיגע צדיקים וקדושים תלמידי בעל שם טוב הק' ותלמידי תלמידיו, זייענדיג א בנן של קדושים אן אייניקל ביים ספינקא רבי'ן זצ"ל, איז דער רבי זצ"ל נתגדל געווארן אין א העכערע אטמאספערע, וועלנדיג אויסשטייגן בדרכי התורה והיראה, מיט התמדת התורה און מידות טובות מיט וואס דער רבי זצ"ל האט זיך מצטיין געווען כל ימי חייו, און געווען באקאנט מיט זיין אצילות און איידלקייט אין יעדן הינזיכט.
דער רבי זצ"ל האט געלערנט אלס קינד אין די ספינקא תלמוד תורה אין וויליאמסבורג, און איז געווען גאר שטארק באליבט ביים גרויסן זיידן הרה"ק רבי הערשעלע זצ"ל. בהגיעו לפירקו איז ער אויסגעקליבן געווארן אלס חתן ביי להבחל"ח כ"ק אדמו"ר מקרעטשניף שליט"א, על ישראל הדרתו אין שטאט רחובות אין ארץ ישראל, און צוזאמען מיט די חשובע רעבעצין תליט"א האט דער רבי אויפגעשטעלט זיין הערליכן שטוב, קינדער און אייניקלעך זרע ברך ה'.
שוין אלס אינגערמאן האט זיך אנגעהויבן די רייכע הרבצת התורה קאריערע פונעם רבי'ן, דינענדיג אלס ספינקא ראש הכולל און מרביץ תורה פאר תלמידים, מיט זיין אויסטערלישע איבערגעגעבנקייט צו יעדן איינעם און זעלטענע ווארעמקייט צו יעדן איד האט ער באוויזן ארויפצוהייבן פילע אידן לאביהם שבשמים, און זיי דערנענטערן צום טאטן אין הימל אויף טריט און שריט.
מיטן הסתלקות פון אביו הגדול דער ספינקא רבי הרה"ק רבי בעריש זצ"ל בעל דובר מישרים, חול המועד סוכות תשס"ח, איז דער רבי זצ"ל אלס עלטסטע זון געווארן אויפגענומען אלס ממלא מקומו בקודש ווייטער צו פירן די עדה הקדושה. דער רבי שליט"א האט איבערגענומען די כתר ההנהגה ביד רמה און משפיע געווען אויף קהל חסידיו ומעריציו כיד ה' הטובה עליו, און אריינגעברענגט תורה וחסידות אויף א שטארקע פארנעם.
ליידער איז דער רבי זצ"ל געווארן אוועקגעריסן בשיא פריחתו, מיט איבער א יאר צוריק האט מען אנדעקט די ביטערע מחלה ה"י ביים רבי'ן, און טראץ וואס מען האט ארויסגעקוקט אויף א רפואה שלימה און געהאפט אז דער רבי וועט זיך ארויסדרייען דערפון, האט זיך די מצב שטארק פארערגערט רח"ל בפרט אין די לעצטע פאר טעג, און יעצט ביינאכט האט דער רבי צוריקגעגעבן זיין ריינע נשמה ליוצרו אין די מאונט סיני שפיטאל אין מאנהעטן, זייענדיג ארומגענומען מיט די קינדער און בני המשפחה.
דער רבי זצ"ל לאזט איבער א לעכטיגע משפחה, מחברתו הטהורה הרבנית הצדיקת תליט"א, זיין גרויסן שווער כ"ק אדמו"ר מקרעטשניף שליט"א און די שוויגער הרבנית הצדיקת מקרעטשניף תליט"א, און הערליכע דור ישרים יבורך. די דריי זיהן הגה"צ ר' דוד משה הורוויץ שליט"א, איידעם ביי הגה"צ ר' ישראל יוסף קאהן שליט"א בנו הגדול פון כ"ק אדמו"ר מתולדות אהרן שליט"א וראה"כ באר יוסף, הגה"צ ר' יואל הורוויץ שליט"א, איידעם ביים רבינ'ס פעטער כ"ק אדמו"ר מסאסוב שליט"א, און הגה"צ ר' שמואל צבי הורוויץ שליט"א, איידעם ביי הגה"צ ר' ישראל שנעעבאלג שליט"א אבד"ק טשערנאוויץ ב"פ. די איידימער הגה"צ ר' ישכר בער ראזענבוים שליט"א זון פון כ"ק אדמו"ר ממאשלוי שליט"א, און הגה"צ ר' יוחנן האגער שליט"א זון פון כ"ק אדמו"ר מוויזניץ שליט"א פון בארא פארק, און נאך איין טאכטער נאך אינדערהיים.
דער רבי זצ"ל לאזט איבער זיינע חשובע געשוויסטער, די ברידער כ"ק אדמו"ר מספינקא מאנסי שליט"א, הגה"צ ר' זלמן לייב הורוויץ שליט"א, כ"ק אדמו"ר מזאבליטוב שליט"א, און הגה"צ ר' יואל הורוויץ שליט"א. די שוועסטערס הרבנית אשת כ"ק אדמו"ר מוויען פלעטבוש שליט"א, הרבנית אשת כ"ק אדמו"ר מסעליש שליט"א, הרבנית אשת הגה"צ ר' נפתלי הירצקא בערגער שליט"א ראה"כ ספינקא, און הרבנית אשת הגה"צ ר' אשר זעליג אשרי שליט"א אבד"ק בית ישכר בעריש רידזש.
די מסע הלוויה איז באשטימט אויף דאנערשטאג מיטאג צוועלף אזייגער, בהיכל בית מדרשו קהל בית שמואל צבי ספינקא אויף 77 וואלווארט סטריט אין וויליאמסבורג, אויפן וועג צום ספינקא בית החיים אין ניו דזשערזי וואו דער רבי זצ"ל וועט געברענגט ווערן למנוחה נכונה.
וכל בית ישראל יבכו את השריפה אשר שרף ה'.
