מיט גרויס צער איז אנגעקומען היינט צופרי די ביטערע בשורה איבער די פריצייטיגע פטירה פון כ"ק אדמו"ר מביאלא אוסטרובא זצ"ל, הרה"צ רבי אברהם ירחמיאל ראבינאוויטש זצ"ל, וועלכער האט אנגעפירט זיין שיינעם הויף אין ירושלים עיה"ק, און איז ליידער נפטר געווארן נאך א שווערע קראנקהייט און ביטערע יסורים די לעצטערע יארן.
דער רבי זצ"ל איז געווען א זון פון כ"ק אדמו"ר מביאלא בני ברק זצ"ל בעל להבת דוד, און א באליבטער אייניקל פון הרה"ק בעל חלקת יהושע מביאלא זצ"ל, ער איז געווען אן איידעם ביי כ"ק אדמו"ר הרה"ק רבי אברהם שלמה מלעלוב זצ"ל, זייענדיג א נצר לשלשלות הקודש לבית ביאלא, לעלוב, סאווראן, און נאך פיל.
דער רבי זצ"ל האט מייסד געווען בית מדרשו אין די גבעת שאול געגנט אין ירושלים, על שם אבותיו הקדושים די הייליגע צדיקים לבית ביאלא און אוסטרובא, ער איז געווען באקאנט מיט זיין עבודת ה' און ווארעמקייט פאר יעדן איד, זייענדיג מקרב אידישע קינדער לאביהם שבשמים.
ליידער האט ער מיטגעמאכט א פעקל ביטערע יסורים אין לויף פון די יארן, די פריצייטיגע פטירה פון אשת נעוריו די רעבעצין ע"ה, א שווערע טראגעדיע מיט צען יאר צוריק ווען זיין טאכטער איז ליידער טראגיש אומגעקומען אין א באס עקסידענט רח"ל, און מיט א האלבע יאר צוריק ווען זיין עלטסטן זון איז ליידער פלוצלינג נפטר געווארן לחיי העולם הבא.
די לעצטע פאר וואכן איז דער רבי זצ"ל געווען שפיטאליזירט אין ניו יארק, זייענדיג אין א שווערן געזונט צושטאנד, און היינט צופרי האט ער צוריקגעגעבן זיין ריינע נשמה ליוצרה, אין בליענדן עלטער פון איין און זעכציג יאר.
די מיטה וועט געפירט ווערן קיין ארץ ישראל לקבורה, וואו די לוויה וועט פארקומען מארגן דינסטאג בבית מדרשו אויף רחוב עמרם גאון אין די גבעת שאול געגנט אין ירושלים, אויפן וועג צום הר הזיתים וואו ער וועט געברענגט ווערן למנוחה נכונה.
דער רבי זצ"ל לאזט איבער זיין זון הב' החשוב יחיאל יהושע ראבינאוויטש נ"י, זיין איידעם הרב משה לאבין שליט"א אייניקל פון כ"ק אדמו"ר מזידטשויב שליט"א פון וומס"ב, און די משפחה פון זיין זון הרב משה מרדכי ז"ל. אזוי אויך לאזט ער איבער זיינע חשובע געשוויסטער, די ברודער כ"ק אדמו"ר מביאלא בני ברק שליט"א, כ"ק אדמו"ר מביאלא בית שמש שליט"א, כ"ק אדמו"ר מביאלא בארא פארק שליט"א, און הגה"צ ר' שמעלקא ראבינאוויטש שליט"א רב חסידי ביאלא ב"ב, הרבנית משידלובצא תליט"א, אשת חבר כ"ק אדמו"ר משידלובצא שליט"א, און הרבנית מסערט וויזניץ תליט"א, אשת חבר כ"ק אדמו"ר מסערט וויזניץ שליט"א.
יהא זכרו ברוך.
