מיט גרויס צער און טרויער ווערט אויפגענומען די ביטערע בשורה איבער די פטירה בשיבה טובה פון הגה"צ רבי ישראל יעקב יוקל הורוויץ זצ"ל אבד"ק זאליזשא, מגדולי וזקני הרבנים אינעם עיר ואם בישראל בארא פארק, וועלכער איז דעם שבת נפטר געווארן בשיבה טובה, אין עלטער פון ניינציג יאר.
דער זאליזשא רב זצ"ל איז געווען דער יונגסטער זון פון כ"ק אדמו"ר הרה"צ רבי חיים שלמה הורוויץ זצ"ל מסטריזוב, און א איידעם ביי הגה"צ רבי אברהם ברוך ראזענבערגער זצ"ל אבד"ק גמזו, ער האט געצויגן א הערליכע יחוס צו די פריערדיגע צדיקים וקדושים לבית ראפשיץ, דזיקוב, מעליץ, ולמעלה בקודש, און האט ממשיך געווען דעם הייליגן עבודה וואס ער האט צוגעזעהן ביי זיינע אבות הקדושים.
העכער א יובל יארן האט ער משמש געווען ברבנות אינאיינעם מיט זיינע עלטערע ברידערס כ"ק אדמו"ר מסטריזוב זצ"ל, און להבחל"ח כ"ק אדמו"ר מסטריזוב שליט"א, בבית מדרשו פון זייער פאטער דער סטריזובער רבי זצ"ל אין בארא פארק.
פארגאנגענע וואך איז דער רב זצ"ל געווארן אפגעפירט צום מאונט סיני שפיטאל אין מאנהעטן צוליב פארשידענע קאמפליקאציעס, און דעם שבת איז ער נפטר געווארן לחיי העולם הבא, בשיבה טובה אין עלטער פון ניינציג יאר.
דער רב זצ"ל לאזט איבער א הערליכע משפחה בליעה"ר בנין וחתנין רבנן, די צוויי זיהן הגה"צ ר' זלמן לייב הורוויץ שליט"א דומ"ץ מכון להוראה אין מאנסי, און הגה"צ ר' אלטר אליעזר הורוויץ שליט"א אבד"ק קדושת יו"ט סאטמאר ב"פ, די איידימער הגה"צ ר' חיים יוסף פריעדמאן שליט"א אבד"ק ברעזאן, הגה"צ ר' מאיר יחזקאל לעמבערגער שליט"א אבד"ק מאקאווא ב"פ, הגה"צ ר' העניך באב"ד שליט"א מטארטיקוב, הגה"צ ר' יואל שפיטץ שליט"א, הגה"צ ר' משה טייטלבוים שליט"א, און זיין עלטערער ברודער להבחל"ח כ"ק אדמו"ר מסטריזוב שליט"א.
זכר צדיק לברכה, לחיי העולם הבא.
