אין די יעצטיגע טעג האבן א צאל גדולי האדמורי"ם אין ניו יארק ערהאלטן א קעניגליכע הזמנה געשיקט פונעם ווייסן הויז אין וואשינגטאן די סי, צו קומען אויף א ספעציעלע זיצונג מיטן אמעריקאנעם פרעזידענט דאנאלד טראמפ ירום הודו, א באזוך וואס איז געפלאנט אויף דעם סוף וואך, דאנערשטאג פרשת נצבים וילך הבעל"ט.
די איינלאדענונג איז געשיקט געווארן צו כ"ק אדמו"ר מסאטמאר שליט"א אין קרית יואל, כ"ק אדמו"ר מסאטמאר שליט"א אין וויליאמסבורג, כ"ק אדמו"ר מסקווירא שליט"א, כ"ק אדמו"ר מבאבוב שליט"א, און כ"ק אדמו"ר מוויזניץ שליט"א פון מאנסי, אין צומענהאנג מיט א וויכטיגע אקציע לטובת כלל ישראל בכלל ובפרט, און צו האבן א ספעציעלע געלעגנהייט צו אויסדרוקן הכרת הטוב פארן הויכגעשעצטן פרעזידענט וואס טוט גאר אסאך פאר די אידישע געמיינדע אין פארשידענע הינזיכטן.
דעם שבת האט כ"ק אדמו"ר מסאטמאר שליט"א אדרעסירט די אנטוויקלונג ביים טיש פרייטאג צונאכטס אינאיינעם מיט די תלמידי המתיבתא אין קרית יואל, און געזאגט אז ער האפט צו קענען אויפטון דערמיט און דערלייכטערן פאר אידישע קינדער.
אצינד ווערן געמאכט העפטיגע צוגרייטונגען און פלאנירונגען דורך טעטיגע עסקנים פון די חסידישע קרייזן מיט די פאליטישע באאמטע, באראטונגען קומען פאר בבתי גדולי האדמורי"ם אויסצוארבעטן די גענויע דעטאלן צו ערמעגליכן אזא היסטארישע באגעגעניש וואס וועט שטארק מעגליך איינגעקריצט ווערן מיט גאלדענע אותיות אין חסידישע היסטאריע על אדמת אמעריקע.
