אלפי חסידי וויזניץ גרייטן זיך אין די טעג צו א גרויסארטיגע יום תפילה ותחנונים, שטייענדיג אין א שווערע צייט ווען דער רועה נאמן כ"ק אדמו"ר מוויזניץ שליט"א לרפו"ש מוטשעט זיך ל"ע מיט שווערע יסורים, און איז ערנסט אפגעשוואכט צוליב די שווערע באהאנדלונגען צו באקעמפן די ביטערע מחלה ה"י.
אין די יעצטיגע טעג האבן די דריי זיהן פונעם רבי'ן שליט"א, הגה"צ ר' חיים מאיר האגער שליט"א אב"ד קרית וויזניץ ב"ב, הגה"צ ר' יצחק ישעי' האגער שליט"א, און הגה"צ ר' יעקב מרדכי האגער שליט"א אב"ד וויזניץ אלעד, אונטערגעשריבן א הייסע בריוו געווידמעט פאר אלע חסידים, צו באשטימען דעם קומענדיגן זונטאג בעפאר ראש השנה, די ערשטע טאג סליחות, אלס א יום תפילה והתעוררות רבתי, ווי עס ווערט געברענגט די גרויסקייט פון דעם טאג וואס איז באשטימט אלס א יום תשובה ותענית, און מען קען אסאך אויסבעטן אין דעם יום המסוגל.
די מעמד זעקה ותחנונים וועט פארקומען אין היכל ביהמ"ד הגדול אין קרית וויזניץ בני ברק, וואו עס וועלן זיך צוזאמנעמען די טויזענטער חסידים פון בני ברק, אינאיינעם מיט די הונדערטער תלמידי הישיבות דחסידי וויזניץ אין בני ברק, אויסצוזאגן גאנץ ספר תהלים בהתעוררות רב, נאכגעפאלגט מיט א סדר לימוד תורה ברבים פאר צוויי שעה רצופות, עס זאל זיין פאר א רפואה פארן רבי'ן שליט"א כ"ק מרן ישראל בן לאה אסתר, שיתחדש כנשר נעוריו און זיך ערהוילן פון דעם שווערן קרענק ה"י.
אין אנדערע נייעס האבן הונדערטער חסידים געהאט די זכיה די וואך אריינצוגיין אל הקודש פנימה, זיך מזכיר זיין בפתקא ופדיון כנהוג פאר די הייליגע טעג, להיפקד בדבר ישועה ורחמים, און דער רבי שליט"א האט ווארעם געוואונטשן די חסידים א גוט געבענטשט יאר.
והן קל כביר לא ימאס תפילת הרבים.
