מיט דערלייכטערונג האבן אלפי חסידי בעלזא און גאנץ כלל ישראל אויפגענומען די בשורה טובה אז די מצב הבריאות ביי כ"ק אדמו"ר מבעלזא שליט"א גייט ב"ה צום בעסערונג, און בחסדי ה' איז דער רבי שליט"א באפרייט געווארן פון שפיטאל היינט, נאכן זיין שפיטאליזירט אין הדסה שפיטאל אין ירושלים די לעצטע דריי טעג.
ווי באריכטעט איז דער בעלזא רבי שליט"א אריינגעפירט געווארן אין שפיטאל פארגאנגענעם זונטאג א' סליחות אינדערפרי, אין די צייט וואס אלפי חסידי בעלזא זענען געווען פארזאמלט אין ביהמ"ד הגדול צו אמירת סליחות, און האבן מיט באזארגענדע געפילן געזאגט די סליחות אן דעם רבינ'ס השתתפות, וואו מען האט מתפלל געווען עטליכע קאפיטלעך תהלים לרפואתו השלימה פונעם רבי'ן.
אין לויף פון די לעצטע דריי טעג איז דער רבי באהאנדלט געווארן אין די הדסה שפיטאל מיט גרויס געטריישאפט, מען האט דורכגעפירט א געוויסע היילונגס פראצעדור צוליב די שווערע אינפעקציע וואס האט זיך געשאפן, און היינט פארמיטאג האבן די דאקטוירים באשטעטיגט אז דער רבי קען זיך אהיימקערן לביתו נאוה קודש זיך צו ווייטער ערהוילן אינדערהיים בס"ד.
נאכן זיך אומקערן אהיים האט דער רבי געדאווענט שחרית בביתו נאוה קודש אין קרית בעלזא ירושלים, און נאכן דאווענען האט דער רבי געבלאזן שופר, און געזאגט די קדישים לרגל די הילולא קדישא פונעם זיידן דער ראש השלשלת הרה"ק בעל שר שלום מבעלזא זי"ע.
כלל חסידי בעלזא ברחבי תבל טוען ווייטער מתפלל זיין לרפואתו השלימה פונעם רבי'ן, דער רבי זאל האבן די כוחות אריינצוקומען אין ביהמ"ד קומענדיגן יו"ט ראש השנה, דאווענען פארן עמוד און בלאזן די תקיעות ווי געווענליך, שיתחדש כנשר נעוריו בבריות גופא ונהורא מעליא.
