אידישע קינדער בכל מקומות מושבותיהם טוען מתפלל זיין לרפואת כ"ק אדמו"ר מבעלזא שליט"א, וועלכער איז היינט צופרי געווארן אריינגעפירט צו די הדסה שפיטאל אין ירושלים, נאך שווערע געזונטהייט קאמפליקאציעס ה"י, און ווי עס שטעלט זיך ארויס ליידט דער רבי שליט"א פון א שווערע אינפעקציע וואס דארף דריגענד באהאנדלט ווערן.
אלפי חסידי בעלזא האבן זיך היינט פארטאגס פארזאמלט אויף אמירת סליחות אין ביהמ"ד הגדול אין קרית בעלזא ירושלים, וואו מען האט א לענגערע צייט ארויסגעקוקט און געווארט אז דער רבי זאל ערשיינען צו סליחות ווי יעדעס יאר. די צייט האט זיך גערוקט א שעה נאך א שעה, ביז ארום עלף אזייגער פארמיטאג ווען דעם רבינ'ס בן יחיד הגה"צ ר' אהרן מרדכי רוקח שליט"א איז אריינגעקומען אין ביהמ"ד און צוגעטרעטן צום עמוד צו סליחות.
באלד נאך סליחות האט דער גבאי ביהמ"ד הרה"ח ר' אהרן קלמן פריעד הי"ו אויסגערופן און געמאלדן פאר די באזארגנדע חסידים אז דער רבי שליט"א איז גענומען געווארן אין שפיטאל זייענדיג ערנסט אפגעשוואכט, און מען האט זיך באלד געשטעלט זאגן תהלים מיט גרויס התעוררות, למען בריאותו השלימה וחיזוק כוחותיו פונעם רבי'ן שליט"א.
שפעטער נאכמיטאג איז געמאלדן געווארן פאר די חסידים אז נאך די אונטערזוכונגען אין שפיטאל איז באשטעטיגט געווארן אז דער רבי ליידט פון א שווערע אינפעקציע, וואס דארף דריגענד באהאנדלט ווערן, און מען האפט אז אין די נאנטע טעג וועט מען שוין קענען באפרייען דעם רבי'ן פון שפיטאל. אידישע קינדער זענען מתפלל פאר כ"ק מרן ישכר דוב בן מרים לרפואה שלימה, בתוך שאר חולי ישראל.
