שטייענדיג צוויי וואכן בעפאר די מידטוירם עלעקשאנס, האט די גאווערנער פון ניו יארק סטעיט פרוי האוקעל באזוכט נעכטן אין עטליכע אידישע צענטערן אין אפסטעיט ניו יארק, וואו זי איז געווארן אויפגענומען בכבוד המלכות דורך טויזענטער אידישע קינדער.
צוערשט איז די גאווערנער אנגעקומען קיין קרית יואל, וואו עס איז פארגעקומען א מלכות'דיגע אויפנאמע אויפן גיגאנטישן פארקינג לאט פון די בית רחל געביידעס, וואו עס האבן זיך פארזאמלט די טויזענטער תלמידות פון בית רחל און נאך פילע איינוואוינער אין שטאט. די טויזענטער בענקלעך און די פלאטפארמעס מיט אלע צוגעהערן איז געווארן צוגעשטעלט דורך די בארימטע רענטעסטיק פארטי רענטל פירמע, וואס האט פאכמאניש אהערגעשטעלט דעם מעמד.
דערנאך האט די גאווערנער באזוכט ביי כ"ק אדמו"ר מסאטמאר שליט"א, אינאיינעם מיט אירע געהילפן און נאך שטאטישע פאליטיקאנטן, וואו מען האט אויסגעשמועסט פארשידענע ענינים העומדים על הפרק.
דערנאך איז די גאווערנער אנגעקומען קיין מאנסי, וואו טויזענטער מיידלעך פון די וויזניצע מיידל שולע האבן אפגעווארט און באגריסט בכבוד המלכות פארנט פון די וויזניצע מיידל שולע אויף קרעסט קט. דערנאך איז פארגעקומען א זיצונג מיט די הנהלה פון מוסדות וויזניץ און די עסקנים פון כתר ווילעדזש, און דערנאך איז די גאווערנער געגאנגען באזוכן דעם כתר ווילעדזש מעיאר ר' אלי' פינקאסאוויטש הי"ו וואס זיצט שבעה די טעג נאך די פטירה פון זיין ברודער ע"ה.
פון מאנסי איז די גאווערנער געפארן קיין שיכון סקווירא, וואו עס איז פארגעקומען א מלכות'דיגע אויפנאמע אין שטוב פון כ"ק אדמו"ר מסקווירא שליט"א, מיט די באטייליגונג פון פילע פאליטיקאנטן און לאקאלע עסקנים.
