בחצר הקודש פאפא ווערט אין די יעצטיגע טעג איינגעפעדימט א נייע סדר לימוד אין ספרי חסידות, אונטערן נאמען "ספרן של צדיקים", נאך וואס כ"ק אדמו"ר מפאפא שליט"א האט געמאלדן ביי די דברות קודש ביים גרויסן מעמד הכן לבבנו פאר די איגוד החבורות דחסידי פאפא, מיט די באטייליגונג פון הונדערטער תלמידי הישיבות, איבער די התייסדות פון א נייע סדר לימוד אין ספרי חסידות יעדן טאג.
אונטער די נייע סדר לימוד "ספרן של צדיקים" וועלן די חסידים עוסק זיין אין ספרי חסידות מיט א קביעות'דיגן לוח מדי יום ביומו, אין עטליכע ספרי חסידות וואס דער רבי שליט"א האט אויסגעקליבן, ספר הק' ערוגת הבושם, ספר הק' מאור עינים, ספר הק' קדושת לוי, און ספר הק' תפארת שלמה. לדעת את המעשה אשר יעשון נאכצוגיין די הייליגע דרך וואס אונזערע גרויסע רבי'ס האבן אויסגעטראטן על דרך הבעל שם טוב הקדוש.
ספעציעלע אסיפות יסוד קומען פאר אין אלע צענטערן פון חסידי פאפא, א אסיפת יסוד אינעם היכל הכולל אין וויליאמסבורג, אין שפיץ פונעם רבינ'ס זון הגה"צ ר' מאיר גרינוואלד שליט"א דומ"ץ פאפא, אינעם היכל הכולל אין מאנסי אין שפיץ פונעם רבינ'ס זון הגה"צ ר' פנחס חיים גרינוואלד שליט"א אבד"ק פאפא מאנסי, אין ביהמ"ד פאפא אין בארא פארק אין שפיץ פונעם רבינ'ס זון הגה"צ ר' לוי יצחק גרינוואלד שליט"א דומ"ץ פאפא ב"פ, אין לעיקוואד אין שפיץ פונעם רבינ'ס זון הגה"צ דומ"ץ פאפא שליט"א, אין לינדען וועט עס פארקומען קומענדיגן שבת קודש בעת רעוא דרעוין, און אין אנדערע שטעט בכל מקום אשר דבר המלך ודתו מגיע.
