די הונדערטער תלמידים אין ישיבת חברון אין ירושלים, האבן היינט מיטגעהאלטן א קעניגליכע באזוך בין כותלי הישיבה, ווען דער ארגענטינע פרעזידענט חאווער מילעי האט באזוכט אין ישיבה, זייענדיג צוגאסט אין ארץ ישראל פאר א לענגערע באזוך.
דער פרעזידענט וועלכער פארמאגט א שטארקע נאנטשאפט צו אידישקייט, האט אויסגענוצט זיין באזוך אין לאנד צו זעהן פונדערנאנט די עולם התורה והישיבות, זייענדיג א שטארקער אידן פריינט וואס זאגט אסאך נאך אין זיינע רעדעס פון אידישע מקורות. שוין פון די פריע מיטאג שעה'ן האט זיך אנגעזעהן פארשטערקערטע זיכערהייט מוסנאמען ארום די בנין הישיבה "כנסת ישראל חברון" אין גבעת מרדכי געגנט אין ירושלים.
אנקומענדיג אין ישיבה מיט א קעניגליכע באגלייטונג איז דער ארגענטינע פרעזידענט געווארן אויפגענומען דורך די ראשי הישיבה און עסקני הכלל, ובראשם הגאון הגדול רבי דוד כהן שליט"א ראש ישיבת חברון. צוערשט איז ער ארויף אויף א גאלערי פון וואו ער האט אראפגעקוקט און זיך באגריסט מיט די בחורים, און דערנאך איז פארגעקומען א שיינע אויפנאמע בהיכל הישיבה, מיט די באטייליגונג פון גדולי ראשי הישיבות ואנשי שם.
צוערשט האט אויפגעטרעטן הרב יוסף חברוני שליט"א מרביץ תורה אין ישיבה, וועלכער האט ווארעם באגריסט דעם עהרנפולן גאסט, און דערנאך האט דער פרעזידענט פון ארגענטינע אויפגעטרעטן מיט רירנדע ווערטער אויסלויבענדיג די אידישע פאלק און לומדי תורה בפרט.
