אין די צייט וואס די מצב הבריאות ביי כ"ק אדמו"ר מוויזניץ שליט"א לרפואה שלימה איז ליידער זייער נישט גוט, איז דעם רבי'נס יונגסטע זון הגה"צ ר' יעקב מרדכי האגער שליט"א אב"ד וויזניץ אלעד ארויסגעקומען היינט מיט א הייסע בקשה צו כלל חסידי וויזניץ איבער די וועלט, מען זאל איינרייסן וועלטן און מתפלל זיין ביים בורא כל עולמים אז דער רבי שליט"א זאל צוריקקומען צו די כוחות און זיך פולקאם ערהוילן.
דער רבי שליט"א וועלכער געפונט זיך במעון הנופש אין מושב אורה נעבן ירושלים, איז ליידער זייער אפגעשוואכט די לעצטע צען טעג, דער רבי ליגט אין גאר א שוואכן צושטאנד און איז ל"ע נישט בכח אנצוגיין מיט די עבודת הקודש ווי געווענליך.
דער וויזניצער רב פון אלעד אפעלירט צו וויזניצע חסידים און גאנץ כלל ישראל אז מען זאל נישט נעמען דעם מצב פאר לייכט, נאר זיך אנשטרענגען און מתפלל זיין, מען זאל חלילה נישט ווערן דערשראקן, אבער מען דארף זיך אויפוועקן און מעתיר זיין בתפילה ותחנונים, צוזאמשטעלן מניני תהלים, ארויסגיין צו קברי אבות און קברי צדיקים ברחבי תבל, איינצורייסן רחמי שמים לרפואתו השלימה פונעם רבי'ן, כ"ק מרן ישראל בן לאה אסתר לרפואה שלימה במהרה.
אזוי אויך איז דער משמש בקודש הרה"ח ר' יעקב אדלער הי"ו ארויסגעקומען מיט א הייסע רוף צום ציבור חסידים, זאגענדיג אז מען האט געזעהן גרויסע רחמים וחסדים אינעם רבינ'ס מצב די לעצטע צוויי יאר, אבער אצינד איז מען ליידער אנגעקומען צו א מצב וואס איז נאך קיינמאל נישט געווען, דער רבי איז גאר ערנסט אפגעשוואכט, אבער עס איז נאך דא א וועג ארויס בדרך הטבע, און מען דארף בלויז תפילות ישראל און קבלות טובות.
אין אנדערע נייעס איז היינט פארגעקומען א סעודת ראש חודש בביתו נאוה קודש פונעם רבי'ן אין מושב אורה, וואו די משוררים אין די וויזניצע הויף זענען אריבערגעקומען און געזינגען ניגוני ראש חודש און ניגוני יו"ט חנוכה, שטייענדיג שוין סמוך ונראה צו די לעכטיגע חנוכה טעג. דער רבי שליט"א האט מיטגעהאלטן די ניגונים און מעודד געווען פאר א שטיק צייט.
