שטייענדיג נאך עטליכע יאר פון העפטיגע בוי ארבעט ביי די באקאנטע "שיינער'ס שוהל" אין מאנסי, איז נארוואס באשטעטיגט געווארן אז אין עטליכע וואכן ארום וועט מען זיך אריבערציען צו די נייע גרויסע שוהל וואס איז געבויעט געווארן הארט קעגן איבער די יעצטיגע שוהל, אויף פארשעי ראוד אין מאנסי.
בית המדרש אור חיים אויף 18 פארשעי, מער באקאנט מיטן נאמען "שיינערס שוהל", איז געעפנט געווארן און ווערט געפירט דורך הנגיד ר' אליעזר שיינער הי"ו, און איז אין די לעצטערע יארן אויסגעשטיגן אלס א מאסיווע מנינים צענטער וואו טויזענטער אידן דאווענען יעדן טאג, פיר און צוואנציג שעה רונדע דעם זייגער.
ביז יעצט איז די בית המדרש געווען איינקוואטירט אין א אלטע געביידע, און אין אויפגעשטעלטע שאטערס דערנעבן, וואס איז ווי פארשטענדליך נישט געווען אזוי געשמאק. אצינד האט מען געענדיגט אויפבויען א שפאגל נייע ריזיגע געביידע הארט קעגן איבער די גאס, מיט גרויסע היכלי תפילה, שטיבלעך און אלע באדערפענישן, אין א פולקאם איינגערישטע בנין וואס וועט צוברענגען גרויס הרחבת הדעת.
תיכף נאך די ימי החנוכה וועט די נייע בית המדרש געעפנט ווערן פארן ברייטן ציבור, די חנוכת הבית וועט פארקומען אינאיינעם מיט א גרויסע מעמד הכנסת ספר תורה ברוב עם הדרת מלך.
