הונדערטער פשעווארסקער חסידים און תושבי אנטווערפן גרייטן זיך צו די קומענדיגע שמחת החתונה בחצר הקודש פשעווארסק, וואס וועט בעז"ה פארקומען אין צוויי וואכן ארום מיטוואך פרשת וישלח, און אין די טעג איז באשטעטיגט געווארן אז צום ערשטן מאל וועט די שמחת החתונה געפראוועט ווערן בהיכל ביהמ"ד הגדול והחדש פשעווארסק אויף די מערקאטאר גאס אין אנטווערפן.
די רעדע איז פון די שמחת החתונה פונעם רבינ'ס אייניקל, די חתן א זון פון זיין איידעם הגה"צ ר' אלעזר פריעדמאן שליט"א מו"ץ בק"ק סאטמאר אין אנטווערפן, זון פון הגה"צ ר' ברוך אברהם פריעדמאן שליט"א דומ"ץ סאמאר העריסאן, מיט די כלה א טאכטער פון הגה"צ ר' ישראל דייטש שליט"א, זון פון הגה"צ אבד"ק מקור חיים שליט"א, און איידעם ביי כ"ק אדמו"ר מקיוויאשד שליט"א.
ביז עטליכע יאר צוריק פלעגט דער פשעווארסקער רבי שליט"א ארומפארן איבער די וועלט צו באשיינען די שמחות במעון קדשו, אבער אין די לעצטערע יארן צוליב זיין הויכן עלטער באשיינט דער רבי שליט"א בלויז ביי די חתונות וואס קומען פאר אין אנטווערפן, די חתונות פלעגט פארקומען אין די בית רחל זאל, און נאר די קבלת פנים איז פארגעקומען אין פשעווארסקער בית המדרש, און די מעמד החופה ברחובה של עיר פארנט פון ביהמ"ד.
אצינד נאכן פארענדיגן די נייע פראכטפולע פארגרעסערטע ביהמ"ד הגדול דחסידי פשעווארסק, און מיטן רבינ'ס עלטער ווען עס קומט אן שווער פארן רבי'ן צו גיין צום בית רחל זאל, איז באשלאסן געווארן אז פון היינט אן וועלן די שמחות געפראוועט ווערן בהיכל ביהמ"ד הגדול, וואס קען שוין ב"ה אקאמאדירן פיל מער מענטשן ווי אין די פארגאנגענע יארן, און עס וועט שטארק פארגרינגערן פארן רבי'ן וועלכער וואוינט הארט נעבן ביהמ"ד הגדול.
לויטן פלאן וועט די מעמד קבלת פנים און חופה פארקומען ווי געווענליך אין ביהמ"ד, די סעודה און ריקודין וועט פארקומען ווי ביז היינט אין זאל פון בית רחל, אבער אן דעם רבינ'ס השתתפות, און צום רבינ'ס ערשיינונג צום שמחה וועלן די בעלי שמחה און אלע משתתפים אריבערקומען צום פשעווארסקער בית המדרש, וואו עס וועט אויפגעשטעלט ווערן הויכשטאקיגע פארענטשעס, און דער רבי שליט"א וועט דארט אין ביהמ"ד זיך וואשן צום סעודה, מיטהאלטן די ריקודין, און אפרעכטן די מצוה טאנץ בשלהבת אש קודש.
